މިއަންހެންމީހާ ރެސްޓޯރަންޓު ތަކުން ހިލޭ ކައި އުޅުނީ އެފްބީއައި އޭޖެންޓަކަށް ވެގެން
ހިލޭ ކާއެއްޗެހި ހޯދަން ބައެއް މީހުންނަކީ އެކިއެކި ކަންކަން ކުރަމުން އަންނަ ބައެކެވެ.
އެމެރިކާގެ ޖޯޖިއާ އަށް އުފަން މިއަންހެންމީހާ ރެސްޓޯރަންޓުތަކުން ހިލޭ ކާން ބޭނުންކުރި އުކުޅަކީ، އޭނާއަކީ އެފްބީއައި އޭޖެންޓެއް ކަމަށް ހެދުމެވެ.
"އެސޯސިއޭޓެޑް ޕްރެސް" ގައި ބުނެފައިވަނީ މިއަންހެންމީހާ ރެސްޓޯރަންޓުތަކަށް ގޮސް، އޭނާއަކީ އެފްބީއައި އޭޖެންޓެއް ކަމަަށް ބުނި ކަމަށާއި އޭނާއަށް ހިލޭ ކާއެއްޗެހި ނުދީފިނަމަ ރެސްޓޯރަންޓުގެ މުވައްޒަފުން ހައްޔަރު ކުރާނެ ކަމަށް ވެސް ބުނި ކަމަށެވެ.
ކިމްބަރލީ ރެގްސްޑޭލް ނަމަކަށް ކިޔާ މިމީހާ ރޮކްމާޓް ފުލުހުން މިހާރު ވަނީ ހައްޔަރު ކޮށްފައެވެ. އޭނާ ހައްޔަރު ކުރީވެސް "ޗިކް-ފިލް-އޭ" ނަމަކަށް ކިޔާ ރެސްޓޯރަންޓަކަށް ގޮސް، އެފްބީއައި އޭޖެންޓެއް ކަމަށް ހެދިގެން އުޅުމުންނެވެ.
އޭނާގެ މައްސަލަ ފުލުހުންނަަށް ރިޕޯޓު ކުރީ އެރެސްޓޯރަންޓުގެ މަސައްކަތު މީހުންތަކެއް ކަމަށާއި ކުރިން ވެސް އޭނާ އެފަދައިން އެތަނަށް ގޮސް ކެއި ކަމަށް ރިޕޯޓުތަކުން ބުނެފައިވެއެވެ.
