ރައީސް ޔާމީން މިނިވަންކުރުމާ މެދު ގޮތެއް ނިންމެވޭނީ ސުޕްރީމްކޯޓު މަރުހަލާއަށް ފަހު- ރައީސް
ކުރީގެ ރައީސް އަބްދުﷲ ޔާމީން މިނިވަންކުރުމާއި މެދު ގޮތެއް ނިންމެވޭނީ ސުޕްރީމްކޯޓު މަރުހަލާއަށް ފަހުގައި ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރާއްޖެ ޓީވީގެ ޕްރޮގްރާމްގައި ރައީސް ޔާމީން މިނިވަންކުރުމަށް އިދިކޮޅު ފަރާތްތަކާއި އެކު ވާހަކަ ދައްކަވާފާނަންތޯ ސުވާލު ކުރުމުން ޖަވާބުގައި ރައީސް ވިދާޅުވީ ހުކުމް ތަންފީޒު ކުރާ މީހަކާ ދޭތެރޭ އަމަލު ކުރާނެ ގޮތް ގާނޫނުގައި އެބައޮތް ކަމަށެވެ.
"ހުކުމް ތަންފީޒު ކުރާ މީހަކާ ދޭތެރޭ އަމަލު ކުރާ ގޮތް އެބަ އޮތް ގާނޫނުގައި. މިހާރު އޮންނަ ގޮތުން ރައީސްއަކަށް ހުންނަ މީހަކަށް ކޮންމެ ކުށަކަށް މައާފެއް ނުދެވޭނެ. އަޅުގަނޑަށް ރައީސް ޔާމީންއާ ދޭތެރޭ ގޮތެއް ނިންމޭނީ ސުޕްރީމް ކޯޓުގެ މަރުހަލާ ނިމުމުން. އޭގެ ކުރިން އަޅުގަނޑަށް ރައީސް ޔާމީންގެ މައްސަލައާ ދޭތެރޭ ވަކި ގޮތެއް ނުނިންމޭނެ." ރައީސް ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވެފައިވަނީ ރައީސްއަކަށް ހުންނަ މީހަކަށް ހުރިހާ ކުށަކަށް މަޢާފު ނުދެވޭނެ ކަމަށެވެ. އަދި ރައީސް ޔާމީން އާއި މެދު ގޮތެއް ނިންމޭނީ ކޯޓު މަރުހަލާއަށް ފަހުގައި ކަމަށް ރައީސް ފާހަގަ ކުރެއްވިއެވެ.
ކްރިމިނަލް ކޯޓުން ފަސް އަހަރަށް ޔާމިން ޖަލަށް ލާފައިވަނީ މަނީ ލޯންޑަރިންގެ އަމަލެއް ހިންގުމުގެ ކުށް ރައީސް ސާބިތު ވެފައިވާތީއެވެ. މީގެ އިތުރުން ފަސް މިލިއަން އެމެރިކާ ޑޮލަރުން ޖޫރިމަނާކޮށް، އެ ފައިސާ ހަ މަސް ދުވަހުގެ ތެރޭގައި މީރާއަށް ދައްކަން ނޮވެންބަރު 28، 2019 ގައި ވަނީ ހުކުމްކޮށްފަ އެވެ. އެ ހުކުމަށް ގިނަ ދުވަސްތަކެއް ނުވަނީސް ހުކުމް އިއްވެވި އިސް ފަނޑިޔާރު ޢަލީ ރަޝީދު ވަނީ ސްޕްރީމް ކޯޓްގެ އިސް ފަނޑިޔާރަކަށް ޕްރޮމޯޓްވެ ވަޑައިގެންފައެވެ.
