މަގާމުގައި ހުންނެވިހާ ދުވަހަކު ދީނީ އެއްބައިވަންތަކަން ހިމާޔަތްކޮށް ރާއްޖޭގެ މިނިވަންކަން ކަށަވަރުކުރާނަން- ރައީސް
ރައީސް ކަމުގައި މަގާމުގައި އެމަނިކުފާނު ހުންނެވިހާ ދުވަހަކު، އެންމެ ބޮޑު ސަމާލުކަމެއް ދޭނެ ދެ ކަމެއް އެބައޮތް ކަމަށާއި އެއީ ދިވެހިންގެ ދީނީ އެއްބައިވަންތަކަން ހިމާޔަތްކުރުމާއި، ދިވެހިރާއްޖޭގެ މިނިވަންކަމާއި ސިޔާދަތު ކަށަވަރުކުރުން ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ ރާއްޖޭގެ 53 ވަނަ ޖުމްހޫރީ ދުވަހުގެ މުނާސަބަތުގައި ދިވެހި ގައުމާ މުހާތަބު ކުރައްވައި ދެއްކެވި ވާހަކަފުޅުގައެވެ.
ރައީސްގެ ވާހަކަފުޅުގައި ވަނީ ދިވެހި ޖުމްހޫރިއްޔާގެ ހަތްވަނަ ވެރިކަމަށް، ދެ އަހަރު ފުރުމާ އެންމެ 6 ދުވަހާ ކައިރިއަށް އާދެވިފައި ކަން ފާހަގަކޮށް، ދެ އަހަރު ތެރޭގައި ހާސިލް ކުރެވުނު ބައެއް ކަންކަމުގައި މައްޗަށް އަލިއަޅުވާލާފައެެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވީ ކޯވިޑް-19އާ ދެކޮޅަށް، ދައުލަތުގެ ބަޖެޓުން ބޮޑު ހޭދައެއް ކުރަންޖެހުނަސް، ތަރައްޤީގެ މަޝްރޫޢުތައް ވެސް މުޅިން ހުއްޓައިނުލައި ކުރިއަށް ގެންދިއުމަށް ސަރުކާރުން ސަމާލުކަން ދެއްވާ ކަމަށެވެ. ޤައުމީ ތަރައްޤީގެ 372 މަޝްރޫޢެއް މިހާތަނަށް ފަށާފައިވާއިރު، ޖުމްލަ 154 މަޝްރޫޢެއް މިހާރުވެސް ހިނގަމުން ދާކަމަށެވެ. އަދި އިތުރު 156 މަޝްރޫޢެއް ފެށުމުގެ މަސައްކަތް މިހާރު ކުރަމުންދާކަމަށް ރައީސް ވިދާޅުވިއެވެ.
އަދި އޭގެ ސަބަބުން ތަރައްޤީގެ މަޝްރޫޢުތަކުގެ އިސްކަންދޭ ތަރުތީބަށްވެސް ބަދަލުގެންނަން ޖެހުނު ނަމަވެސް ދައުލަތް ހިންގުމުގެ ޚަރަދުތައް ކުޑަކޮށްގެންވިޔަސް، ސަރުކާރުގެ މަޤްޞަދަކަށްވީ، ރައްޔިތުންނަށް އެހީތެރިކަން ފޯރުކޮށްދީ، އަސާސީ ޚިދުމަތްތަކަށާއި، ރައްޔިތުންނަށް ލިބެންވާ ޙިމާޔަތާއި ރައްކާތެރިކަމަށް، އެއްވެސް ހީނަރުކަމެއް އަޔަނުދީ، ޤައުމު ހިންގަމުން ދިޔުން ކަމުގައި ރައީސް ވިދާޅުވިއެވެ،
"ކޯވިޑް-19އާ ދެކޮޅަށް މަސައްކަތް ކުރަމުން، އަސާސީ ޚިދުމަތްތައް ފޯރުކޮށްދެމުން މިއައީ، ސަރުކާރުގެ އެއްވެސް މުވައްޒަފަކު ވަކިނުކޮށް، އަދި އެއްވެސް މުވައްޒަފެއްގެ މުސާރަވެސް ކުޑަނުކޮށް. އަދި ވަޒީފާ ގެއްލުނު މީހުންނަށް އެހީތެރިވުމާއެކު، ވިޔަފާރިތަކަށް ވެސް އެހީތެރިކަން ފޯރުކޮށްދެމުން." ރައީސް ފާހަގަ ކުރެއްވިއެވެ.
އެމަނިކުފާނު ވިދާޅުވީ ޞިއްޙީ ދާއިރާ ލާމަރުކަޒު ކުރުމުގެ 56 މަޝްރޫޢެއް، އަންނަ އަހަރުގެ ތެރޭގައި، ރާއްޖޭގެ އެކި އަތޮޅުތަކުގައި ކުރިއަށް ގެންދާނެ ކަމަށެވެ އޭގެ ތެރެއިން، މިސަރުކާރުން އެންމެބޮޑު އިސްކަމެއް ދީގެން ފެށި އެއް މަޝްރޫޢުގައި ހިމެނޭ، 5 ޓާޝަރީ ހޮސްޕިޓަލް ތަރައްޤީ ކުރުމުގެ މަސައްކަތް ކުރިއަށްދާނެ ކަމަށެވެ. މި 5 ޓާޝަރީ ހޮސްޕިޓަލުގެ މަންފާ އަންނަ އަހަރުގެ ތެރޭގައި ރައްޔިތުންނަށް ލިބެން ފަށާނެ ކަމަށް ރައީސް ވިދާޅުވިއެވެ.
ކޯވިޑް-19އާ ގުޅިގެން އައި އިޤްތިޞާދީ ގެއްލުންތަކުން އަރައިގަތުމަށް މަސައްކަތްކުރާއިރު، ސަރުކާރުން އެންމެ ބޮޑު އިސްކަމެއްދޭނެ އެއް ކަމަކީ، މީހުން ބިނާކުރުން ކަމަށް ރައީސް ވިދާޅުވިއެވެ. އެގޮތުން، ތަޢުލީމީ ދާއިރާއިން 2021 ވަނަ އަހަރު ހިންގާ މަޝްރޫޢުތަކުގެ ތެރެއިން، ރާއްޖޭގެ 5 ސަރަޙައްދެއްގައި ފެންވަރު ރަނގަޅު، ވަށައިޖެހޭ ތަޢުލީމީ ނިޒާމަކަށް ބޭނުންވާނެ، އިންސާނީ އަދި ޢުމްރާނީ ވަސީލަތްތައް ތަރައްޤީކުރުމަށް އިސްކަން ދެވޭނެކަމަށެވެ.
"މަތީ ތަޢުލީމުގެ ދާއިރާއިން އަޅުގަނޑު އެންމެ ފަޚުރުވެރިވާ އެއް ކަމަކީ، މި ސަރުކާރުގެ ފުރަތަމަ އަހަރު ތައާރަފްކުރި ޑިގްރީ ފެންވަރަށް ހިލޭ ކިޔަވައިދިނުމުގެ ޕްރޮގްރާމް. މި ޕްރޮގްރާމްގެ ދަށުން މިހާތަނަށް 8200 އަށްވުރެ ގިނަ ކުދިންނަށް ހިލޭ ކިޔެވުމުގެ މަގު ސަރުކާރުން ފަހިކޮށްދީފި. އަދި މިސަރުކާރުން ހަމަޖައްސައިދިން ސްޓޫޑެންޓް ލޯންގެ ލުއިތަކާ އެކު، 23 ޤައުމެއްގައި، 1082 ދަރިވަރަކު މިހާރު އަންނަނީ މަތީ ތަޢުލީމް ޙާޞިލްކުރަމުން" ރައީސް ވިދާޅުވިއެވެ.
މީގެ އިތުރުން، މިދިޔަ ދެ އަހަރުވެސް، ބައިނަލްއަޤްވާމީ ދާއިރާއިން، ރާއްޖެއަށް ބޮޑެތި ކުރިއެރުންތަކެއް ޙާޞިލް ކުރެވިފައިވާކަމަށް އެމަނިކުފާނު ވިދާޅުވިއެވެ. މިދާއިރާއިން އެންމެ ފާހަގަ ކޮށްލެވެނީ، ހީނަރުވެފައި އޮތް ޚާރިޖީ ގުޅުންތައް އަލުން ހަރުދަނާކުރެވި، ބައިނަލްއަޤްވާމީ މުޖްތަމަޢާއެކު ގާތް ގުޅުމެއް އުފެދިގެން ދިޔުންކަމަށެވެ. އޭގެ ނަތީޖާއެއްގެ ގޮތުން، ވަރަށް ގިނަ މާލީ އެހީތަކެއް ވެސް ލިބެމުންދާކަމަށް ރައީސް ވިދާޅުވިއެވެ.
