ހޯރަފުށީ އެއާޕޯޓް ރަސްމީކޮށް ހުޅުވަނީ
ނޮވެމްބަރު 17 ވަނަ ދުވަހު ހއ. ހޯރަފުށީ އެއާޕޯޓު ރަސްމީކޮށް، ހުޅުވައި ހިދުމަތް ދޭން ފަށާނެ ކަމަށް ޓްރާންސްޕޯޓް މިނިސްޓްރީން ވިދާޅުވެއްޖެ އެވެ.
އެ މިނިސްޓްރީން ހާމަކޮށްފައިވާ ގޮތުގައި ނޮވެމްބަރު 16 ވަނަ ދުވަހު ހޯރަފުށީ އެއާޕޯޓަށް ޓެސްޓް ފްލައިޓް ޖައްސަން ވަނީ ނިންމާފައެވެ. އަދި ޓެސްޓް ފްލައިޓަށް ފަހު އެއާޕޯޓަށް ޝެޑިއުލް ދަތުރުތައް ކުރާނެ ދުވަހެއް ނިންމާނެ ކަމަށް މިނިސްޓްރީން ބުނެފައިވެއެވެ.
ހޯރަފުށި އެއާޕޯޓުގެ މަސައްކަތް ކުރަނީ އެމްޓީސީީސީ އިންނެވެ. އެ އެއާޕޯޓު ތަރައްގީ ކުރަނީ 1.2 ކިލޯމީޓަރުގެ ރަންވޭއަކާއި 86،35 ސްކޮޔާ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9،473 ސްކޮޔާ މީޓަރުގެ ޕާކިން އޭރިއާއަކާއި 1،718 ސްކޮޔާ މީޓަރުގެ ފަޔާ އެކްސެސް މަގަކާ އެކު އެވެ.
މީގެ އިތުރުން ޓަރމިނަލްގެ ކުރިމަތީ ސަރވިސް ރޯޑު ޤާއިމްކޮށްފައި ވެއެވެ. އަދި ޕަސެންޖަރ ޓަރމިނަލްއަކާއި ފަޔަރ ބިލްޑިންގ އިމާރާތް ވެސް ވަނީ ޤާއިމް ކޮށްފައެވެ.
އެއާޕޯޓު ތަރައްގީ ކުރުމުގެ މަސައްކަތަށް ގާތްގަނޑަކަށް 198 މިލިއަން ރުފިޔާ ހޭދަކޮށްފައި ވެއެވެ.
އަދި މި އެއާޕޯޓު އެޅުމަށް ހޯރަފުށީ ފަޅުން 345،000 އަކަމީޓަރުގެ ސަރަހައްދެއް ވަނީ ހިއްކައިފައެވެ.
