ރާއްޖެ މިނިވަންކަންމަތީ އޮތުމުގެ މަސްދަރަކީ އިސްލާމްދީން: ރައީސް ޞާލިޙު
މިނިވަން ގައުމެއްގެ ގޮތުގައި ދިވެހިރާއްޖެ ދެމިއޮތުމުގެ މަސްދަރަކީ އިސްލާމްދީން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ވިދާޅުވެއްޖެއެވެ.
ރާއްޖެ އިސްލާމްވި ދުވަހުގެ ތަހުނިޔާ އާއި ހެޔޮއެދުން ދަންނަވަމުން ރައީސް ޞާލިޙު ކުރެއްވި ޓްވީޓެއްގައި ވިދާޅުވީ މި ރާއްޖެ މިނިވަން ގައުމެެއްގެ ގޮތުގައި ދެމިއޮތުމުގެ މަސްދަރަކީ އިސްލާމްދީން ކަމަށެވެ.
އިސްލާމްދީނުގެ ނޫރު އަބަދަށްމެ މި ދިވެހިފަސްގަނޑުގައި ދެމެހެއްޓެވުން އެދި ރައީސްގެ ޓްވީޓުގައި ދުޢާ ކުރައްވާފައިވެއެވެ.
ރައީސް ޞާލިޙުގެ އިތުރުން ނައިބު ރައީސް ފައިސަލް ނަސީމް ވެސް ވަނީ މިދުވަހުގެ ތަހުނިޔާ ފޮނުއްވާފައެވެ.
ނައިބު ރައީސް ވިދާޅުވީ ދިވެހިންނަށް ލިބުނު އެންމެ މަތިވެރި ނިއުމަތަކީ އިސްލާމްދީނުގެ އަލިގަދަ ނޫރުން ހިތްތައް އަލިކުރެއްވުން ކަމަަށެވެ. އަދި ތާއަބަދަށް މުސްލިމުން ކަމުގައި ދެމިތިބުމުގެ ހެޔޮތައުފީގު ދެއްވުންއެދި ނައިބު ރައީސް ފައިސަލް ނަސީމް ވަނީ ދުޢާ ކުރައްވާފައެވެ.
ރާއްޖެ އިސްލާމްވީ ހިޖުރައިން 542 ވަނަ އަހަރުގެ ރަބީޢުލްއާޚިރް މަހުގެ ދެވަނަ ދުވަހުގައެވެ. މިއަހަރު މިދުވަސް ދިމާވެފައި ވަނީ މިއަދަށެވެ.
