ނުކުޅެދުންތެރިކަން ހުންނަ ފަރާތްތަކަށް ދޭ ޢިނާޔަތް އިތުރު ކޮށްދިނުމަށް އެޗްއާރްސީއެމް އިން ގޮވާލައިފި
ނުކުޅެދުންތެރިކަން ހުންނަ ފަރާތްތަކަށް ދައުލަތުންދޭ ޢިނާޔަތް އިތުރު ކޮށްދިނުމަށް އެޗްއާރްސީއެމުން ގޮވާލައިފިއެވެ.
އެޗްއާރުސީއެމްއިން މިހެން ބުނީ ބައިނަލްއަޤްވާމީ ގޮތުން ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހާ ގުޅިގެން ނެރެފައިވާ ނޫސް ބަޔާނެއްގައެވެ.
އެޗްއާރްސީއެމުން ބުނެފައި ވަނީ ނުކުޅެދުންތެރިކަން ހުންނަ ފަރާތްތަކަށް ދައުލަތުންދޭ މާލީ ޢިނާޔަތަކީ އެފަރާތްތަކަށް ބޭނުންވާ އަސާސީ ކަންކަމަށް އެކަށީގެންވާ މިންވަރެއް ކަމަށް ނުވާތީ، އެފަރާތްތަކަށް ޢިނާޔަތުގެ ގޮތުގައި ދޭ ފައިސާގެ ޢަދަދު އިތުރުކުރުމަށް ގޮވާލާ ކަމަށެވެ.
މީގެ އިތުރުން ، ދައުލަތުގެ ބެލުމުގެ ދަށުގައި، ޚާއްސަ އެހީއަށް ބޭނުންވާ މީހުންގެ މަރުކަޒުގައި ތިބި ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ކަށަވަރުކޮށްދިނުމަށް ވެސް އެ ބަޔާނުގައި އެދިފައިވެއެވެ.
ހަމަ އެހެންމެ ފާއިތުވި 4 އަހަރު ދުވަހުގެ ތެރޭގައި ޖުމްލަ 50 މައްސަލައެއް ، ނުކުޅެދުންތެރިކަން ހުންނަ މީހުންގެ ޙައްޤުތައް ގެއްލިގެން އެ ކޮމިޝަނަށް ހުށައަޅާފައި ވާކަމަށް އެޗްއާރްސީއެމުން ބުނެފައިވެއެވެ. ކޮމިޝަނުން ބަލާފައިވާ މައްސަލަ ތަކުގެ ތެރޭގައި ނުކުޅެދުންތެރިކަން ހުންނަ ފަރާތްތަކަށް ލިބެންވާ މާލީ އެހީތެރިކަން ނުލިބިގެން ހުށަހަޅާފައިވާ މައްސަލަތަކާއި ދައުލަތުގެ ފަރާތުން އިހުމާލުވެފައިވާ މައްސަލަތައް ވެސް ހިމެނެއެވެ.
އެޗްއާރްސީއެމް އިން ބުނެފައި ވަނީ ދިވެހިރާއްޖޭގައި އުޅޭ ނުކުޅެދުންތެރިކަން ހުންނަ މީހުންގެ ޝަރުއީ ދަފްތަރެއް އެކުލަވާލާފައި ނުވާ ކަމަށެވެ. އެހެންކަމުން އެކަން ވީހާ ވެސް އަވަހަކަށް އެކުލަވައިލުމަށް އެޗްއާރުސީއެމުން ވަނީ އެދިފައެވެ.
