ހުދުމުހުތާރު ވެރިކަން މިފެށުނީ: ޑރ. ޖަމީލު
ސިޔާސީ ހަރަކާތްތައް ހިންގަވަން ރައީސް އިބްރާހިމް މުޙައްމަދު ޞާލިޙު މަސައްކަތްޕުޅު ކުރައްވަނީ އިދިކޮޅު ސިޔާސީ ފަރާތްތައް ކަސްތަޅު އަޅުވާފައި ކަމަށާއި، ހުދުމުހުތާރު ވެރިކަން މި ފެށުނީ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ލ. ގަމަށް ރައީސް ޞާލިޙާއި ސަރުކާރުގެ ބައެއް އިސްވެރިން ކުރެއްވި ދަތުރުފުޅާ ގުޅިގެން ފާޑުވިދާޅުވަމުން ޑރ. ޖަމީލު ވިދާޅުވީ ދަތުރުކޮށް ކެމްޕެއިން ކުރުމުގެ ހަމަހަމަ ފުރުސަތު އިދިކޮޅަށް ވެސް އޮންނަން ޖެހޭ ކަމަށެވެ.
އޮޅުވާލައިގެން ކެމްޕެއިނު ކުރުން ހުއްޓާލައްވަން ގޮވާލައްވަމުން، ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ ޖަލު ހުކުމަށް އިޝާރާތް ކުރައްވާ ޑރ. ޖަމީލު ވިދާޅުވީ މިއީ ހުދުމުހުތާރު ވެރިކަމެއްގެ ފެށުން ކަމަށެވެ. އެގޮތުން ޖަމީލު ވިދާޅުވީ ރައީސް ޞާލިޙު ސިޔާސީ ހަރަކާތްތައް ހިންގަވަން އުޅުއްވަނީ އިދިކޮޅު ލީޑަރާއި ޕާޓީ ކަސްތޮޅު އެޅުވުމަށް ފަހުގައި ކަމަށެވެ.
