ނަމާދަކީ ކުރަން އޮތް ކަމެއްކޮށް ނިންމާފައި ހިތަށް އެރި ގަޑިއަކު ކުރަން އޮންނަ އަޅުކަމެއް ނޫން!
ނަމާދަކީ ކުރަން އޮތް ކަމެއްކޮށް ނިންމާފައި ހިތަށް އެރި ގަޑިއަކު ކުރަން އޮންނަ އަޅުކަމެއް ނޫން ކަމުގައި މަޝްހޫރު ދީނީ ޢިލްމުވެރިޔާ ޝެއިޚް ޢަލީ ޒައިދު ހަނދުމަ ކޮށްދެއްވައިފިއެވެ.
ޝެއިޚް ޒައިދު މިރޭ ކުރެއްވި ޓްވީޓެއްގައި ވިދާޅުވެފައިވަނީ ނަމާދަކީ ކުރަން އޮތް ކަމެއްކޮށް ނިންމާފައި ހިތަށް އެރި ގަޑިއަކު ކުރަން އޮންނަ އަޅުކަމެއް ނޫން ކަމަށާއި އެއީ ވަގުތު ކަނޑައެޅިގެންވާ ފަރުޟެއް ކަމަށެވެ.
"އިސްލާމްދީނުގެ ދެވަނަ ރުކުން! ކޮންމެ ނަމާދެއް ވެސް އެނަމާދެއްގެ ވަގުތުގެ ތެރޭގައި ކުރެއްވުމަށް ހަނދާން ކޮށްދެން" ޒައިދު ވިދާޅުވެފައިވެއެވެ.
ޝެއިޚް ޒައިދު މިރޭ މިހެން ވިދާޅުވެފައި މިވަނީ، ނަމާދަށް ދާން ޖެހޭނީ އެވަގުތު ކުރަން އިން މަސައްކަތެއް އަވަހަށް ކޮށް ނިންމުމަށްފަހުގައި ކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިރޭ ވިދާޅުވެފައި ވަނިކޮށެވެ.
މަޖިލީހުގައި ކުރިއަށްދިޔަ ޖަލްސާ މެދުކަނޑާލުމުގެ ކުރިން މެންބަރުންނާ ވާހަކަ ދައްކަވަމުން ނަޝީދު ވިދާޅުވީ ނަމާދަށް ދާން ޖެހެނީ އެކުރާކަމެއް އަވަހަށްކޮށް ނިންމުމަށް ފަހުގައި ކަމަށެވެ.
"ނަމާދަށް އަރުއްވާ ބޭފުޅުންނަށް އެނގިވަޑައިގަންނަވާނެ މިހާރު ޢިޝާ ނަމާދަށް ގޮވަނީ 07:12 ގައިކަން. މަޣުރިބު ނަމާދަށް ހަމަ ދެންމެއަކު އެގޮވީ. މާވަށު ދާއިރާގެ އިއްޒަތްތެރި މެންބަރަށް ދަންނަވާލަން ބޭނުން ނަމާދުގައި އޮންނަ ގޮތަކީ އެކުރާކަމެއް އަވަހަށްކޮށް ނިންމާފައި ނަމާދަށް ދިއުން. އެގޮތަށް އަޅުގަނޑުމެންނަށް މިކަމުގައި އަބަދުވެސް އެނގިފައި އޮންނަނީ." މާވަށު ދާއިރާގެ މެންބަރު މުހައްމަދު ސައީދަށް ނިސްބަތް ކުރައްވާ ރައީސް ނަޝީދު ވިދާޅުވިއެވެ.
