ޤައުމަށް ރިވެތި ނަން ހޯދައިދިނުމަށް މަސައްކަތް ކުރުމަށް ރައީސް ޒުވާނުންނަށް ގޮވާލައްވައިފި
ޤައުމަށް ރިވެތި ނަން ހޯދައިދޭން ގަދަ އަޅައި މަސައްކަތް ކުރުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޒުވާނުންނަށް ގޮވާލައްވައިފިއެވެ.
ހުޅުމާލޭގައި ތަރައްޤީކޮށްފައިވާ ނޭޝަނަލް މާޝަލް އާޓްސް ސެންޓަރާއި، ޓޭބަލް ޓެނިސް ހޯލް ރަސްމީކޮށް ހުޅުއްވައިދެއްވުމަށް މިއަދު ހަވީރު ބޭއްވި ރަސްމިއްޔާތު ޝަރަފުވެރިކޮށްދެއްވައި ރައީސް ވަނީ ވާހަކަފުޅު ދައްކަވާފައެވެ.
އެގޮތުން ރައީސްގެ ވާހަކަފުޅުގައި ވަނީ ސަރުކާރުން ތަރައްޤީ ކޮށްފައިވާ ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފައި، ކުޅިވަރު އެސޯސިއޭޝަންތަކުގެ އެހީތެރިކަމާއެކު، ޤައުމަށް ރިވެތި ނަން ހޯދައިދިނުމަށް ކުޅިވަރުގެ ދާއިރާގައި ހަރަކާތްތެރިވާ ހުރިހާ ޒުވާނުންނާއި އެ ޒުވާނުންގެ ބެލެނިވެރިންނަށް ގޮވާލައްވާފައެވެ.
މީގެ އިތުރުން ރައީސްގެ ވާހަކަފުޅުގައި ވަނީ ކޮންމެ ޒުވާނަކީ ވެސް، އަދި ވަކީން ޚާއްޞަކޮށް ކުޅިވަރުގެ ދާއިރާގައި ހަރަކާތްތެރިވާ ޒުވާނުންނަކީ، ދީނީ ގޮތުންނާއި އަޚުލާޤީ ގޮތުން ރިވެތި ނަމޫނާއަކަށްވުމަށް އެދިވަޑައިގެންފައެވެ.
އަދި ކުޅިވަރުގެ ދާއިރާއިން މީހުން ބިނާ ކުރުމާއި، އެކި ކުޅިވަރުތަކުން ރަނގަޅު ނަތީޖާތަކެއް ހާސިލުކުރުމުގައި އެހީތެރިވެދިނުމުގައި ސަރުކާރުން ދެ ކަމަށް ވިސްނައިގެން މަސައްކަތްކުރާ ކަން ފާހަގަކުރައްވައި ރައީސް ވިދާޅުވީ އެ ދެ ކަމަކީ ކުޅިވަރުގެ ދާއިރާއިން ޒުވާނުންނަށް ކުރިއަރައިދިއުމަށް ބޭނުންވާނެ ވަސީލަތްތައް ތަރައްޤީކުރުމާއި، މި ދާއިރާއަކީ ސިޔާސީ ނުފޫޒުން އެއްކިބާވެފައިވާ ދާއިރާއެއް ކަން ކަށަވަރު ކޮށްދިނުން ކަމުގައެވެ.
