ބަޣާވާތް ކުރި ހުރިހާ ފުލުހުން ވަކިކުރުމުގެ ފުރުސަތު ފަހިވެއްޖެ: އެލެކްސް އަހުމަދު
ދިވެހި ފުލުހުންގެ ޚިދުމަތުގެ އައު ބިލާއެކު، ބަޣާވާތް ކުރި ހުރިހާ ފުލުހުން ވަކިކުރުމުގެ ފުރުސަތު ފަހިވެއްޖެ ކަމުގައި މަޖިލީހުގެ ރައީސް މުހައްމަދު ނަޝީދުގެ ނުރަސްމީ އައިޑީ ކަމަށް ބުނެވޭ "އެލެކްސް އަހްމަދު" ޓްވިޓާ އެކައުންޓުން ކުރެއްވި ޓްވީޓެއްގައި ވިދާޅުވެއްޖެއެވެ.
އިނގިރޭސިވިލާތުން ރާއްޖެއަށް ކަނޑައަޅުއްވަފައި ހުންނަވާ ސަފީރު ކެރޮން ކޮމިޝަނަރ އޮފް ޕޮލިސް މުހައްމަދު ހަމީދާ އެކު ބޭއްވެވި ބައްދަލުވުމެއްގެ ޓްވީޓަކަށް އެލެކްސް އަހްމަދުގެ ނަމުގައި މުހައްމަދު ނަޝީދު ވަނީ ރިޕްލައި ކުރައްވާފައެވެ.
އެލެކްސް ވިދާޅުވީ ފުލުހުންގެ ގާބިލްގެ ސަބަބުން ފުލުހުންގެ މުއައްސަސާއަށް ކުރިއެރުން ލިބިގެންދާނެ ކަމަށާއި ފުލުހުންގެ މުއައްސަސާ އިސްލާހް ކުރެވި ބަޣާވާތް ކުރި ހުރިހާ ފުލުހުން ވަކިކުރުމުގެ ފުރުސަތު އެބިލްގެ ސަބަބުން ފަހިވެގެން ދާނެކަމަށެވެ.
ފުލުހުންގެ އާބިލަށް ހުށަހެޅި އިސްލާހުގައި ބުނެފައިވަނީ ޕޮލިސް ބޯޑުން ފުލަހަކަށް ވީތީ އެމީހަކަށް ލިބިފައިވާ ޤާނޫނީ ބާރާއި އިޚުތިޔާރު ނަހަމަ ގޮތުގައި ބޭނުންކުރާ އޮފިސަރުންނާ މެދު ގޮތެއް ނިންމާ ތަންފީޒު ކުރެވެންދެން ޤާނޫނަށް އަމަލުކުރަން ފެށިއިރު އެމީހުން ތިބި ރޭންކުތަކުގައި ދެމިތިބޭނެ ކަމަށެވެ.
އަދި މިއޮފިސަރުން ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭ ނުވަތަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓްކުރެވިފައިވާ އޮފިސަރުންނަކީ އެމަގާމުތަކަށް ގާބިލް އަދި މަގާމާ އެކަށޭނެ ހުނަރާއި މަސައްކަތުގެ ތަޖުރިބާ އާއި ނަޒާހާތްތެރިކަން ހުރި އޮފިސަރުން ކަމާމެދު ޕޮލިސް ބޯޑުން ގޮތެއް ކަނޑައަޅަންވާނެ ކަމަށެވެ.
