ޝަހީބްގެ ބަންދުގެ އަމުރުގެ އަޑުއެހުންތައް ނިންމާލައިފި

ރާއްޖެއަށް އެތެރެކުރަން އުޅުނު 130 ކިލޯގެ މަސްތުވާތަކެތީގެ މައްސަލައިގައި އިސްކޮށް އުޅުމުގެ ތުހުމަތުކުރެވޭ ޝަހީބް އިބްރާހީމް، ލައިޓްހައުސް، ގއ. ވިލިނގިލި, ޝަރީއަތް ނިމެންދެން ބަންދުގައި ބެހެއްޓުމަށް ހައިކޯޓުން ނިންމި ނިންމުން އޭނާގެ ފަރާތުން ސުޕްރީމް ކޯޓުގައި އިސްތިއުނާފްކޮށްފައިވާ މައްސަލައިގެ އަޑުއެހުންތައް ނިންމާލައިފިއެވެ.

Ads by MWSC

މި މައްސަލައިގެ އިސްތިއުނާފް އަޑުއެހުން ކުރިޔަށްދިޔައީ އާދިއްތަ ދުވަހު ސުޕްރީމް ކޯޓުގައެވެ.

މި މައްސަލަ ބައްލަވާ ފަނޑިޔާރުންގެ ބެންޗުގެ އިސްފަނޑިޔާރު ޑރ. މުހައްމަދު އިބްރާހީމް ވިދާޅުވެފައިވަނީ، މި މައްސަލައިގައި ފަނޑިޔާރުން އިތުރުކަމެއް ސާފުކުރަން ނެތްނަމަ ދެން ބޭއްވޭނީ މި މައްސަލައާމެދު ގޮތެއް ނިންމުމަށް ބޭއްވޭ ޝަރީއަތް ކަމަށެވެ. ޝަހީބު ހައްޔަރު ކޮށްފައި ވަނީ ހުޅުމާލޭ ކައިރީ އޮތް ދޯންޏަކުން ފެނުނު 130 ކިލޯ މަސްތުވާތަކެތީގެ މައްސަލައިގައެވެ. އެ މައްސަލައިގައި ޝަހީބު ހިމެނޭގޮތަށް ހަތް މީހަކު ފުލުހުން ހައްޔަރުކުރި އެވެ.

އެ މައްސަލައިގައި އޭނާ ހައްޔަރުކޮށް 14 ދުވަހަށްފަހު، އެކަށީގެންވާ ހެކި ނެތް ކަމަށް ބުނެ ކްރިމިނަލް ކޯޓުން ދޫކޮށްލި އެވެ.

އާދިއްތަ ދުވަހު ކުރިޔަށްދިޔަ އަޑުއެހުމުގައި މައްސަލަ ބަލާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު ޑރ. މުހައްމަދު އިބްރާހިމް، ފަނޑިޔާރު އާއިޝާ ޝުޖޫން މުހައްމަދުގެ އިތުރުން ފަނޑިޔާރު މަހާޒް އަލީ ޒާހިރުއެވެ.