މުއިއްޒުގެ ސުވާލު: ކޮރަޕްޝަނުގެ އެންމެ ބޮޑު ދެ މީހުން ގޭގައި ތިބެނީ ރައީސްގެ ހެޔޮފުޅުކަމުންތޯ؟
އެމްއެމްޕީއާރްސީގެ ޚިޔާނާތުގައި އެންމެ އިސްކޮށް ހަރަކާތްތެރިވެ، ކޮރަޕްޝަންގެ ކުށް ސާބިތުވެފައިވާ ދެމީހުން ގޭގައި ބައިތިއްބާފައި ތިބީ ރައީސްގެ ހެޔޮފުޅުކަމުންތޯ ކުރީގެ ޕްރޮސެކިއުޓާ ޖެނެރަލް އަދި ގާނޫނީ ވަކީލު އަހްމަދު މުއިއްޒު ސުވާލު ކުރައްވައިފިއެވެ.
އެމްއެމްޕީއާރްސީ ޚިޔާނާތުގައި އެންމެ އިސްކޮށް އުޅުއްވީ ކުރީގެ ނައިބު ރައީސް އަދީބު އާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުއެވެ.
ނަމަވެސް ޖަލު ހުކުމް އިއްވުމަށް ފަހުގައި ވެސް އަދީބު ވެސް އަދި ޒިޔަތު ވެސް މިވަގުތު ހުންނެވީ ގޭބަންދުގައެވެ.
މިކަމަށް ފާޑުވިދާޅުވެ، މުއިއްޒު ކުރެއްވި ޓްވީޓުގައި ވަނީ ސުވާލުތަކެއް އުފައްދަވާފައެވެ.
"ސަޅި. އެންމެ ބޮޑެތި ކޮރަޕްޝަންގެ ކުށް ސާބިތުވި ދެ މީހުން ޖަލުގައި ނުތިބެ ގޭގައި މި ތިބެނީ އިއްތިފާގުންތޯ. ނޫނީ ރައީސްގެ ހެޔޮފުޅު ކަމުންތޯ،" ރައީސް އޮފީހާއި ކަރެކްޝަންސް އާއި ޕީޖީ ފަދަ ކަމާ ގުޅޭ މުއައްސަސާތައް ޓެގް ކުރައްވައި، ކުރީގެ ޕީޖީ ލިޔުއްވިއެވެ.
އަދީބުގެ މައްޗަށް ދައުލަތުން އުފުލި ހަތް ދައުވާއަށް އިއުތިރާފްވެ ދައުލަތާ އެކީ ގާއިމް ކުރި ކުށުގެ އިއުތިރާފް އެއްބަސްވުމުގެ ދަށުން އޭނާގެ މައްޗަށް އިއްވީ 20 އަހަރުގެ ޖަލު ހުކުމަކާއި ދެ މިލިއަން ރުފިޔާގެ ޖޫރިމަނާގެ ހުކުމެކެވެ. އަދި ޒިޔަތުގެ މައްޗަށް އުފުލި 30 ދައުވާއަށް އިއުތިރާފްވެ ދައުލަތާ އެކު ގާއިމް ކުރި އެއްބަސްވުމުގެ ދަށުން އޭނާގެ މައްޗަށް އިއްވީ 11 އަހަރުގެ ޖަލު ހުކުމެކެވެ. އޭގެ ކުރިން އޭނާއަށް އަށް އަހަރުގެ ޖަލު ހުކުމެއް ވެސް އިއްވާފައި ވެއެވެ.
