"އަދުލުގެ ނިޒާމުގައި މައްސަލަ ހުއްޓަސް ޑްރަގް ޓްރެފިކް ކުރުން ހުއްޓުވާނެ"
އަދުލު އިންސާފުގެ ނިޒާމުގައި މައްސަލަތައް ހުރި ނަމަވެސް ޑްރަގް ޓްރެފިކް ކުރުން ހުއްޓުވަން ފުލުހުން މަސައްކަތް ކުރިއަށް ގެންދާނެ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
މިއަދު މާލޭގައި ފުލުހުން ކުރިއަށްގެންދިޔަ ޑްރަގުގެ ބޮޑު އޮޕަރޭޝަނާ ގުޅިގެން ކުރެއްވި ޓްވީޓެއްގައި ސީޕީ ހަމީދު ވިދާޅުވީ، މި އޮޕަރޭޝަނުގައި 71 ކިލޯގެ ހެރޮއިން އަތުލައިގެންފައިވާ ކަމަށާއި އެ ތަކެތީގެ މަގުމަތީ އަގު 71 މިލިއަން ރުފިޔާ އަށް އަރާނެ ކަމަށެވެ.
"އަދުލު އިންސާފުގެ ނިޒާމުގައި މައްސަލަތައް ހުރި ނަމަވެސް ޑްރަގް ޓްރެފިކް ކުރުން ހުއްޓުވަން ފުލުހުން ކުރާ މަސައްކަތް ކުރިއަށް ގެންދާނެ” ސީޕީ ހަމީދު ވިދާޅުވިއެވެ.
މިއަދު ހަވީރު ފަރީދީ މަގު ބަންދުކޮށްގެން ފުލުހުން ކުރިއަށްގެންދިޔަ މި އޮޕަރޭޝަނުގައި ޖުމްލަ 10 މީހަކު ވަނީ ހައްޔަރު ކޮށްފައެވެ.
ރާއްޖޭގައި ޑްރަގް ޓްރެފިކް ކުރުން ހުއްްޓުވަން ފުލުހުން ވަނީ ފަހަަކަށް އައިސް ގިނަ އޮޕަރޭޝަންތަކެއް ހިންގައި ގިނަ އަދަދެއްގެ ޑްރަގް އަތުލައިގަނެ، ތުހުމަތު ކުރެވޭ އެތައް ބަޔަކު ހައްޔަރުކޮށްފައެވެ.
