ވެރިން ދައުލަތުގެ ޚަޒާނާއިން ވައްކަން ނުކުރާނަމަ ޖަލަށް ލާކަށް ނުޖެހޭނެ: ނިޔާޒް
ވެރިން ދައުލަތުގެ ޚަޒާނާއިން ވައްކަން ނުކުރާނަމަ ޖަލަށް ލާކަށް ނުޖެހޭނެކަމަށް ކުރީގެ އޮޑިޓަރ ޖެނެރަލް ނިޔާޒް އިބްރާހިމް ވިދާޅުވެއްޖެއެވެ.
ނިޔާޒް މިހެން ވިދާޅުވީ ހޯމަ ދުވަހު ކުރިޔަށްދިޔަ މަޖިލީހުގެ ރައީސާ ސުވާލު ކުރެއްވުމަށް ހުޅުވާލި ފުރުސަތުގައި އާންމު ރައްޔިތަކު ކުރެއްވި ސުވާލަށް ޖަވާބު ދެއްވަމުން ވެރިން ޖަލަށްލުން ހުއްޓަން ޖެހޭ ކަމަށް ނަޝީދު ވިދާޅުވުމާ ގުޅިގެންނެވެ.
އިދިކޮޅު ލީޑަރު އަދި ކުރީގެ ރަައީސް އަބްދުﷲ ޔާމީން ޖަލު ބަންދުން ގެއަށް ބަދަލު ކުރާނީ ކޮން އިރަކުންތޯ އާންމުންގެ މީހަކު ކުރި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ ރާއްޖޭގެ ވެރިކަން ކުރާ ބޭފުޅުންނާ ދޭތެރޭ ފަހުން ކަންކަން ވެގެންދާ ގޮތް ގިނަ ރައްޔިތުންނަށް ކަމު ނުދާ ކަމަށެވެ. އަދި ދިވެހި ހުރިހާ ރައްޔިތުން އެއްވެސް ސިޔާސީ ލީޑަރަކާ ގަޔާ ނުވާ ކަމަށް ވެސް އެމަނިކުފާނު ވިދާޅުވިއެވެ.
ޖޭއެސްސީގައި ވެސް ހިމެނިވަޑައިގަންނަވާ ރައީސް ޔާމީންގެ އެންމެ ބޮޑު ވާދަވެރިޔާ ، ރައީސް ނަޝީދުގެ މި ވާހަކަތަކާ ގުޅިގެން ނިޔާޒު ވިދާޅުވީ ދައުލަތުގެ ވެރިން ގާނޫނީ އިމުގެ ބޭރަށް ނުދާނަމަ ޖަލަށް ލާން ނުޖެހޭނެ ކަމަށެވެ.
"ފުރަތަމަ ކަމަކީ ވެރިން ދައުލަތުގެ ހަޒާނާއިން ވައްކަން ނުކުރުން، ނާޖައިޒު ފައިދާ ލިބިގަތުމާއި ހޯދައިނުދިނުން، ބޭއިންސާފު ނުވުމާއި އަނިޔާވެރި ނުވުން، ގާނޫނީ އިމުގެ ތެރެއިން ބޭރަށް ނުދިޔުން، އޭރުން ޖަލަށް ލާކަށް ނުޖެހޭނެ" ނިޔާޒު ވިދާޅުވިއެެވެ.
ނަޝީދު ވިދާޅުވީ ވެރިކަމަށް ވަޑައިގަންނަވާ ކޮންމެ ބޭފުޅަކު އޭގެ ކުރިން ވެރިކަން ކުރެއްވި ބޭފުޅަކު ޖަލަށް ލެއްވުމުގެ ސަގާފަތް ގެންގުޅޭނަމަ ވެރިން ޖަލަށްލުމުގެ އާދަ ނުހުއްޓޭނެ ކަމަށެވެ.
