ހުރިހާ ބާރެއް އެމްޑީޕީއަށް ލިބުމުން އަދިވެސް ދައްކަނީ ބަހަނާ: ސެންބެ
ހުރިހާ ބާރުތަކެއް ވެރިކަން ހިންގާ އެމްޑީޕީއަށް ދިނުމުން އަދިވެސް އެޕާޓީން އަންނަނީ ބަހަނާ ދައްކަމުން ކަމުގައި ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފު (ސެންބެ) ވިދާޅުވެއްޖެއެވެ.
ސެންބެ މިހެން ވިދާޅުވީ ލ.މާވަށުގައި ޕީޕީއެމްއިން އޮންލައިންކޮށް ބޭއްވި ޖަލްސާގައި ވާހަކަ ދައްކަވަމުންނެވެ.
ސެންބެ ވަނީ ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީއަށް ވޯޓު ދިނުމުގެ ކުރިން ވަރަށް ރަނގަޅަށް ވިސްނަން ޖެހޭ ކަން ފާހަގަ ކުރައްވާފައެވެ.
ސެންބެ ވިދާޅުވީ ފާއިތުވި ލޯކަލް ކައުންސިލް އިންތިހާބާއި، ރިޔާސީ އިންތިހާބުގެ އިތުރުން މަޖިލިސް އިންތިހާބު ވެސް ހޯއްދެވީ އެމްޑީޕީއިން ކަމަށާއި އެހެންކަމުން މިއަދު ދައުލަތުގެ ހުރިހާ ބާރުތަކެއް މިއަދު އޮތީ އެމްޑީޕީ އަތް މަތީގައިކަމަށެވެ.
އަދި ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީގެ ވެރިން ރަށްރަށަށް ވަޑައިގަތުމުން ރިޔާސީ އިންތިޚާބާއި މަޖިލިސް އިންތިޚާބުގައި އެ ބޭފުޅުން ވެވަޑައިގެންނެވި ވަޢުދުތަކާ ގުޅޭ ގޮތުން ސުވާލުކުރަން ޖެހޭ ކަމަށް ވެސް އޭނާ ވިދާޅުވިއެވެ.
