ސަރުކާރުގެ އެންމެ އިސް ސިޔާސަތަކީ ރައީސް ޔާމީނަށް އަނިޔާ ކުރުން: ސަލީމް
ސަރުކާރުގެ އެންމެ އިސް ސިޔާސަތަކީ ރައީސް ޔާމީނަށް އަނިޔާ ކުރުން ކަމުގައި އިދިކޮޅު ޕީޕީއެމްގެ ޕާލިމެންޓަރީ ގުރޫޕުގެ ލީޑަރު އޭދަފުށީ ދާއިރާގެ މެމްބަރު އަހްމަދު ސަލީމް ވިދާޅުވެއްޖެެވެ.
ސަލީމް މިިހެން ވިދާޅުވީ ބައިނަލްއަޤްވާމީ އިންސާނީ ހައްޤު ތަކުގެ ދުވަހާ ގުޅިގެން، ރައީސް އިބްރާހިމް މުހައްމަދު ސޯލިހް އިއްވި ޚިތާބާ ގުޅޭ ޚަބަރެއް ޓުވިޓާގައި ހިއްސާ ކުރައްވަމުންނެވެ.
ބައިނަލްއަޤްވާމީ އިންސާނީ ހައްޤު ތަކުގެ ދުވަހާއި ގުޅިގެން ރައީސް ވިދާޅުވީ ކޯވިޑްގެ ބަލިމަޑުކަމުން ލިބުނު ގެއްލުންތަކުން އަރައިގަތުމަށް ކުރާ މަސައްކަތުގައި ސަރުކާރުގެ އެންމެ އިސް ސިޔާސަތަކީ، ރާއްޖޭގައި ދިރިއުޅޭ އަދި ރާއްޖެއަށް ޒިޔާރަތްކުރާ އެންމެންގެ އިންސާނީ ޙައްޤުތައް، ތަފާތު ކުރުމެއް ނެތި ފުރިހަމައަށް ރައްކާތެރިކޮށްދިނުން ކަމުގައެވެ.
ރައީސްގެ މި ވާހަކަފުޅާއި ގުޅިގެން ސަލީމް ކުރެއްވި ޓްވީޓްގައި ވަނީ ސަރުކާރުގެ އެންމެ އިސް ސިޔާސަތަކީ ރައީސް ޔާމީންގެ އިންސާނީ ހައްޤުތަކަށް އަރައިގަތުމާއި އެމަނިކުފާނަށް އަނިޔާ ކުރުން ކަމަށެވެ.
ރައީސް ޔާމިން ގެންދަވަނީ ދައުލަތުން އުފުލި މަނީ ލޯންޑަރިން ދައުވާ ސާބިތުވެ 5 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެމައްސަލަ މިހާރު ހައިކޯޓުގައި އިސްތިއުނާފު ކޮށްފައިވާއިރު ސަރުކާރުން ދަނީ ރައީސް ޔާމީންގެ ވަކީލުންނަށް އެމަނިކުފާނާ ބައްދަލު ކުރުމަށް ހުރަސް އަޅަމުން ކަން ފާހަގަ ކޮށްލެވެއެވެ.
