މުސްލިމުންނަށް ފާރަލަމުންދާކަން އެނގުމުން ވާވޭއާއެކު ވެފައިވާ އެއްބަސްވުން އެންޓޮއިން އުވާލައިފި
ޗައިނާ އިން އުއީގަރ މުސްލިމުން ހައްޔަރު ކުރުމަށް ފާރަލަމުންދާކަން ހާމަވުމުން، އެޤައުމުގެ ކުންފުންޏެއް ކަމަށްވާ ވާވޭ އާއެކު ވެފައިވާ ބްރޭންޑް އެމްބެސަޑަރުކަމުގެ އެއްބަސްވުުން، ފްރާންސްގެ ޤައުމީ ފުޓްބޯޅަ ޓީމުގެ ކުޅުންތެރިޔާ އެންޓޮއިން ގްރީޒްމަން، އުވާލައިފިއެވެ.
ރިޕޯޓުތަކުން ބުނެފައިވާ ގޮތުގައި، އިލެކްޓްރޯނިކްސް ގެ އެކި އުފެއްދުންތައް އުފައްދަމުން އަންނަ ވާވޭ ކުންފުނިން ވަނީ އުއީގަރ މުސްލިމުން ދެނެގަތުމަށް އެމީހުންނަށް ފާރަލުމުގައި ޗައިނާ ސަރުކާރަށް އެހީވެފައެވެ. އަދި ޗައިނާ ސަރުކާރުން އުއީގަރ މުސްލިމުންނާމެދު ކަންތައް ކުރަނީ ނުހަނު އިހާނެތިކޮށް ކަމަށް މުޅި ދުނިޔެއަށް ވެސް ވަނީ ހާމަވެފައެވެ.
އެނގިފައިވާ ގޮތުގައި ވާވޭއިން ވަނީ އުއީގަރ މުސްލިމުން ހާމަކޮށްދޭ ގޮތަށް "ފޭޝަލް ރިކޮގްނިޝަން" ޑޭޓާ އެއް އީޖާދު ކޮށްފައެވެ. އޭގެ ސަބަބުން ޗައިނާ ސަރުކާރަށް އެމީހުން ދެނެގަންނަން ވަރަށް ފަސޭހަވެއެވެ. އަދި އެމީހުން ހައްޔަރު ކުރެއެވެ.
ވާވޭ އިން މުސްލިމުންނަށް އަނިޔާ ކުރުމުގެ ގޮތުން ކުރި މިޢަމަލު މުޅި ދުނިޔެއަށް ފަޅާއެރުމުން، އެންޓޮއިން ވަނީ އޭނާއަށް އެކުންފުނިން ދީފައިވާ ބްރޭންޑް އެމްބެސެޑަރު ކަމުގެ އެއްބަސްވުން އުވާލާފައެވެ. މީސްމީޑިއާގައި އެކަމާ ގުޅޭ ގޮތުން އޭނާ ވަނީ ބަޔާނެއް ވެސް ނެރެ ، އެއްބަސްވުން އުވާލައިފިކަމާއި އޭގެ ސަބަބު ވެސް ކަށަވަރު ކޮށްދީފައެވެ.
އެންޓޮއިން އަށް ވާވޭ ކުންފުނީގެ ބްރޭންޑް އެމްބެސެޑަރުކަން ލިބިފައިވަނީ 2017 ވަނަ އަހަރުން ފެށިގެންނެވެ.
ޗައިނާގެ އުއީގަރ މުސްލިމުންނަށް ދެމުންދާ އަނިޔާތަކާ ދެކޮޅަށް މީގެ ކުރިން މަޝްހޫރު ފުޓްބޯޅަ ކުޅުންތެރިޔާ މެސަޓް އޮޒިލް ވެސް ވަނީ އަޑު އުފުލާފައެވެ.
މުސްލިމުންނަށް ފާރަލުމަށް މިފަދަ ޑޭޓާއެއް ހެދި ކަމަށް ޗައިނާއިން އަދިވެސް އަންނަނީ ދެކޮޅު ހަދަމުންނެވެ. އަދި އެމީހުން ބުނެފައިވަނީ އުއީގަރ މުސްލިމުން ކޭމްޕެއްގައި ބޭތިއްބުމަކީ ހަރުކަށި ފިކުރު" ނައްތާލުމަށް ކުރަމުންދާ މަސައްކަތެއް ކަމަށެވެ.
ނަމަވެސް އެތަނުގައި މުސްލިމު އަންހެނުން ރޭޕް ކުރާ ކަމަށާއި، މުސްލިމުންނަށް ބަނގުރާ ބޯންދީ، އޫރު މަސް ވެސް ކާންދޭ ކަމާއި އަދި ގަދަކަމުން މުސްލިމު ނޫން މީހުންނާއި ކައިވެނި ވެސް ކުރުވާކަން، އެތަނުން ސަލާމަތްވި ބައެއް މީހުން ވަނީ ކިޔައިދީފައެވެ.
