ކޮވިޑް-19: ފުރުވާލި ބިދޭސީންގެ ނައްސި ނަތީޖާ ނެތިގެން މޯލްޑިވިއަން ޖޫރިމަނާ ކޮށްފި
ރާއްޖެއިން މިދިޔަ ބުރާސްފަތި ދުވަހު ފުރުވާލި ބަންގްލަދޭޝް ރައްޔިތުންގެ ކޮވިޑް-19ގެ ނައްސި ނަތީޖާގެ ސެޓްފިކެޓް ނެތިގެން، ގައުމީ އެއާލައިން ، މޯލްޑިވިއަން ޖޫރިމަނާ ކޮށްފިއެވެ.
ބަންގްލަދޭޝްގެ މީޑިއާތަކަށް މައުލޫމާތު ދެއްވަމުން ހަޒުރަތު ޝާހުޖަލާލް އިންޓަނޭޝަނަލް އެއާޕޯޓް (އެޗްއެސްއައިއޭ)ގެ އެގްޒެކެޓިވް މެޖިސްޓްރޭޓް އަހުމަދު ޒާމިލް ވިދާޅުވީ، ރާއްޖެއިން މިދިޔަ ބުރާސްފަތި ދުވަހު ފުރުވާލި 200 ބަންގްލަދޭޝް ރައްޔިތުންގެ ތެރެއިން ގިނަ މީހުންގެ އަތުގައި ކޮވިޑް-19އަށް ނައްސި ނަތީޖާ ނެތް ކަމަށެވެ.
މިކަމާ ގުޅިގެން އެފަރާތުން ވަނީ ރާއްޖޭގެ ޤައުމީ އެއާލައިން މޯލްޑިވިއަން، ދެ ލައްކަ ތިރީސް އަށް ހާސް ބަންގްލަދޭޝް ޓާކާ (2،800 އެއްހާ އެމެރިކާ ޑޮލަރު) އިން ޖޫރިމަނާކޮށްފައެވެ.
ބަންގްލަދޭޝްގެ ސިވިލް އޭވިއޭޝަން ޤާނޫނުގައި މިހާރު ބުނެފައި އޮންނަ ގޮތުންނަމަ، މިހިނގާ ޑިސެމްބަރު މަހުގެ 5ވަނަ ދުވަހުން ފެށިގެން އެޤައުމަށް އެތެރެވާ ކޮންމެ މީހެއްގެ އަތުގައި 72 ގަޑިއިރު ހަމަނުވާ ކޮވިޑް-19 ގެ ނައްސި ނަތީޖާއެއް އޮންނަން ޖެހެއެވެ.
އެޤައުމުގެ ސިވިލް އޭވިއޭޝަނުން ބުނެފަައިވާ ގޮތުގައި މިއީ ބަންގްލަދޭޝްގައި ކޮވިޑް-19 ގެ ދެވަނަ ރާޅެއް އެރުން ކުޑަ ކުރުމަށް އަޅާފައިވާ ފިޔަވަޅެކެވެ.
