މޫނުގައި ނަގާ ބިހިތައް ފިލުވުމަށް ލޮނުމެދު ވަރެއް ހަމަ ނެތް!
މޫނުގައި ބިހި އަދި އޮށާޅަ ނެގުމަކީ ގިނަ ބަޔަކު ވަރަށް ކަންބޮޑުވެގެން އުޅޭ ކަމެކެވެ. އަދި އެކަމާހެދި ނުހަނު އުނދަގޫ ވެގެން ވެސް އުޅޭ ކަމެކެވެ. ވަކިން ހާއްސަކޮށް، ކޮންމެ ވެސް ކަހަލަ ހަފްލާއެއް ނުވަތަ ރަސްމިއްޔާތަކާ ދިމާކޮށް މޫނުގައި ބިހި ނެގުމަކީ ގިނަ ބަޔަކު ވަރަށް ދެރަވެ ހިތާމަ ކުރާ ކަމެކެވެ. ވާނީ ވެސް އެހެންނެވެ. އެފަދަ އުފާވެރި ދުވަސްތަކުގައި ރީތި ފޮޓޯތައް ނަގައި މީސްމީޑިއާގައި ހިއްސާކުރަން މިއަދު އެންމެން ވެސް ބޭނުންވެއެވެ.
މޫނުގައި ނަގާ އޮށާޅަތައް ހަލާކު ކުރުމަކީ ވެސް ގިނަ ބަޔަކު ކުރާ ކަމެކެެވެ. އެއީ ވެސް މޫނު ރީތި ކުރެވޭތޯއެވެ. ނަމަވެސް އާޚިރު ނަތީޖާއަކަށް ވަނީ މޫނުގައި ފާރު ހެދުމެވެ. ކޮންމެއަކަސް މޫނުގައި ބިހި ނެގުމަށް ވެސް ތަފާތު ފަރުވާތައް އެބަހުއްޓެވެ. އޭގެ ތެރެއިން ވެސް އެންމެ މޮޅު އެންމެ ފަސޭހަ އެއް ފަރުވާ އަކީ ލޮނުމެދު ބޭނުން ކުުރުމެވެ.
ލޮނުމެދަކީ މޫނުގައި ނަގާ ބިހިތަކަށް އޮތް ފަރުވާއެކޭ ބުނުމުން ހައިރާން ވެސް ވެދާނެއެވެ. އެހެން ނަމަވެސް މިއީ ހަގީގަތެވެ. ލޮނުމެދަކީ ސިއްހަތަށް ވަރަށް ފައިދާ ހުރި އެއްޗެކެވެ. ލޮނުމެދަކީ ހަށިގަނޑުގެ ދިފާއީ ނިޒާމް ވަރުގަދަ ކޮށްދޭ އެއްޗެއް ވެސް މެއެވެ. އަދި ހަމަ އެންމެ ރޯ ލޮނުމެދު ކެއުމަކީ ކްލޮސްޓްރޯލްގެ މިންވަރު ރަނގަޅުވަރެއްގައި ހިފަހައްޓައިދޭ ކަމެކެވެ.
ލޮނުމެދުގެ ސިއްހީ ފައިދާތަކުގެ ވާހަކަ ދައްކާ ކޮޅުން ނުލާނެއެވެ. ލޮނުމެދަކީ 18 ވަނަ ގަރުނުގައި ހަނގުރާމަ ތަކުގައި އުޅުނު ސޯލްޖަރުން އެމީހުންގެ ގައިގެ ފާރުވާ ތަންތަނުގައި ވެސް އުނގުޅި އެއްޗެކެވެ. ބޭނުމަކީ އެފަދަ ފާރުގަނޑުތައް ނުބައިވިޔަ ނުދިނުމެވެ. އަދި އިންފެކްޝަން ތަކުން ސަލާމަތް ކުރުމެވެ. އެހެން ނަމަވެސް އިންފެކްޝަން ތަކުން ރައްކާތެރިވުމަށް މިއަދު މާ ރަނގަޅު ބޭސްތައް އެބަހުއްޓެވެ. ސާބިތުވާ ކަމަކީ އެ ދުވަސްވަރު ފާރުގަނޑުތަކުގައި ލޮނުމެދު ބޭނުން ކުރުމަކީ އޭގެ ސަބަބުން އިންފެކްޝަންތަކުން ވެސް ރައްކާތެރި ކޮށްދޭ ކަމެއް ކަމެވެ.
ސުވާލަކީ ލޮނުމެދު ބޭނުން ކޮށްގެން މޫނުގައި ހުންނަ ބިހިތައް ފިލުވާލާނީ ކިހިނަކުން ހެއްޔެވެ.މިކަން ކުރަން އެންމެ ރަނގަޅީ ނިދުމުގެ ކުރިންނެވެ. އެންމެ ފުރަތަމަ ލޮނުމެދުގެ ކޮޅު ބުރި ކޮށްލާށެވެ. އަދި އެއަށްފަހު ވަޅި ބޭނުން ކޮށްގެން ލޮނުމެދު އަރިއެއް ނަގާށެވެ. ބޭނުމަކީ ލޮނުމެދުގައި ހުންނަ ދިޔަ ތަންކޮޅެއް ގިނައިން އަންނަ ވަރަށް ލޮނުމެދު ފަޅި ކޮށްލުމެވެ. ލޮނުމެދު ފަޅި ކުރުމަށްފަހު ލޮނުމެދު އަރި މޫނުގައި ނަގާފައިވާ ބިހި ނުވަތަ އޮށާޅައިގައި ހާކާލާށެވެ. ހަނދާން ކުރާށެވެ. މުހިންމީ ލޮނުމެދުގައި ހުންނަ ދިޔަ އެ ބިހިތަކުގައި ހޭކުމެވެ. އަދި ހޭކުމަށްފަހު ފޮހެނުލާ އެ ރޭ ނިދަން އޮށޯންނާށެވެ.
މިކަން ގަވައިދުން ކުރަމުން ގެންދާނަމަ މޫނުގައި ނަގާފައިވާ ބިހިތައް މާ ގިނަ ދުވަސްތަކެއް ނުވެ ފިލައިގެން ގޮސްފާނެއެވެ.
ސަމާލުކަން ދޭންވީ ކަމެއް
ލޮނުމެދަކީ ބައެއް މީހުންގެ ހަންގަނޑާ ނުގުޅޭ އެއްޗަކަށް ވެސް ވެެދާނެއެވެ. އެހެންކަމުން އެންމެ ފުރަތަމަ މޫނުގައި ހޭކުމުގެ ބަދަލުގައި އަތުގެ އުޅަނބޮށި ނުވަތަ އެހެން ވެސް ތަނެއްގައި މި ކަން ޓެސްޓު ކޮށްލުން މުހިންމެވެ.
