އަންނަ އަހަރު ކޮލެޖްތަކާއި ސްކޫލްތަކުގައި ކިޔަވައިދޭން ފެށޭނެކަމުގެ އުއްމީދު ބޮޑު - ޑރ.ހަސަން ހަމީދު
އަންނަ އަހަރު ސްކޫލްތަކާއި ކޮލެޖްތަކާއި ޔުނިވަސިޓީތަކަށް ދަރިވަރުން ހާޒިރުވެ، ކިޔަވައިދޭން ފެށޭނެ ކަމަށް އުއްމީދު ކުރައްވާ ކަމަށް ގައުމީ ޔުނިވަސިޓީގެ ޗާންސެލަރ ޑރ.ހަސަން ހަމީދު ވިދާޅުވެއްޖެއެވެ.
ޑރ.ހަސަން ހަމީދު މިހެން ވިދާޅުވެފައި ވަނީ ކުރެއްވި ޓްވީޓެއްގައެވެ. ކޮވިޑް-19އަށް ފައްސިވާ މީހުންގެ އަދަދު މަދުވަމުންދާތީ އަންނަ އަހަރު ސްކޫލްތަކާއި ކޮލެޖްތަކާއި ޔުނިވަސިޓީތައް ހުޅުވޭނެ ކަމުގެ އުންމީދު ބޮޑު ކަމަށް ހަސަން ވިދާޅުވިއެވެ.
ކޮވިޑް-19އަށް ފައްސިވާ މީހުންގެ އަދަދު މަދުވަމުންދާތީ އެކަން ފާހަގަކޮށް ހަސަން އިތުރަށް ވިދާޅުވީ އިއްޔެ ކޮވިޑް-19 އަށް ފައްސިވި މީހުންނާއެކު ފާއިތުވި ހަތް ދުވަހުގެ ތެރޭގައި ކޮވިޑް-19 އަށް ފައްސިވި މީހުންގެ އެވްރެޖް 24.3 އަށް މަދުވެފައިވާ ކަމަށެވެ. އަދި މިއީ ޖުލައި މަހުގެ 09 ވަނަ ދުވަހުން ފެށިގެން މިހާ ދަށަށް ދިޔަ ފުރަތަމަ ފަހަރު ކަމަށާއި ލޮކްޑައުން ކުރިތާ މިހާރު 8 މަސް ވެފައި ވާކަން ވެސް ޓްވީޓްގައި ފާހަގަ ކޮށްފައި ވެއެވެ.
އެގޮތުން އިއްޔެ ކޮވިޑް-19 އަށް ރާއްޖެއިން ވަނީ 20 މީހުން ފައްސިވެފައެވެ. ފައްސި ވެފައިވަނީ މާލެއިން 15 މީހުންނާއި އަތޮޅުތެރެއިން 2 މީހަކާއި ހިންގަމުން އަންނަ ރިސޯޓުތަކުން 3 މީހެކެވެ. މިހާރު ރާއްޖެއިން މިބައްޔަށް ޖުމްލަ 13،368 މީހުން ފައްސި ވެފައި ވެއެވެ.
މާލެ އިން ކޮވިޑް-19 އަށް ފައްސިވާ މީހުންގެ އަދަދު 20 އަށް ވުރެ ދަށުގައި ހުންނަތާ މިހާރު ހަތަރު ދުވަސް ވެއްޖެއެވެ.
