"މުސްލިމުންގެ ހަށިތައް އަންދާނުލުމަށް ލަންކާ ސަރުކާރުގައި ދެންނެވުން މާރަނގަޅު ނޫންތޯ؟"
އަވަށްޓެރި ޝްރީލަންކާ ގައި ކޮވިޑް-19 ޖެހިގެން މަރުވާ މުސްލިމުން އަންދާ ނުލަން އެޤައުމުގައި ދެންނެވުން މާރަނގަޅުކަމަށް ރާއްޖޭ ސަރުކާރަށް ފެނިވަޑައި ނުގަންނަވާތޯ ކުރީގެ ރައީސް މައުމޫން ޢަބްދުލްޤައްޔޫމް ވިދާޅުވެއްޖެއެވެ.
ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވެފައިވަނީ ޝްރީލަންކާ ގައި ކޮވިޑް ޖެހިގެން މަރުވާ މުސްލިމުންގެ ހަށިތައް ރާއްޖޭގައި ވަޅުލައި ދިނުމުގެ ބަދަލުގައި އިސްލާމީ އުޚުއްވަތްތެރި ކަމުގެ ރޫޙުގައި އެމީހުންގެ ހަށިތައް އަންދާ ނުލުމަށް އެޤައުމުގެ ސަރުކާރުގައި ދެންނެވުން މާރަނގަޅު ވާނެ ކަމަށެވެ.
"ޝްރީލަންކާ ގައި ކޯވިޑް ޖެހިގެން މަރުވާ މުސްލިމުންގެ ހަށިތައް ރާއްޖޭގައި ވަޅުލައި ދިނުމުގެ ބަދަލުގައި އިސްލާމީ އުޚުއްވަތްތެރި ކަމުގެ ރޫޙުގައި އެމީހުންގެ ހަށިތައް އަންދާނުލުމަށް ޝްރީލަންކާ ސަރުކާރުގައި ދެންނެވުން މާރަނގަޅުވާނެ ނޫންތޯ؟" ރައީސް މައުމޫން ވިދާޅުވެފައިވެއެވެ.
އަވަށްޓެރި ޝްރީލަންކާ ގައި ކޮވިޑް-19 ޖެހިގެން މަރުވާ މުސްލިމުންގެ ހަށިގަނޑުތައް ރާއްޖޭގައި ވަޅުލައި ދިނުމަށް އެދި އެޤައުމުގެ ރައީސް ގޯޓާބަޔާ ރާޖަޕަކްސާ، ރައީސް އިބްރާހިމް މުޙައްމަދު ޞާލިޙު އަރިހުން އެދިވަޑައިގަތުމުން، ކުރިގެ ރައީސް މައުމޫން ވަނީ އެކަން ކުރުމާމެދު ދެކޮޅު ހައްދަވާފައެވެ.
އެގޮތުން ރައީސް މައުމޫން ވިދާޅުވެފައި ވަނީ އެހެން ގައުމުތަކުގެ އެކި ދީންތަކުގެ މީހުން ރާއްޖެ އައިސް އުފާވެރިކަމާ އެކު ރާއްޖޭގައި އުޅެން ރާއްޖޭން މަރުހަބާ ކިޔާ ކަމަށާއި، ނަމަވެސް ކޮވިޑް-19 ޖެހިގެން މަރުވާ ބިދޭސީން ރާއްޖެ ގެނެސް ވަޅުލުމަކީ އެމަނިކުފާނަށް ތާއީދު ކުރެއްވޭ ކަމެއް ނޫން ކަމަށެވެ.
