މުޢިއްޒު ބަލި ނުކުރެވޭނެކަން ރައީސް ނަޝީދަށް ކަށަވަރު ވެއްޖެ: އަދުރޭ
ކުރިއަށް އޮތް ލޯކަލް ކައުންސިލް އިންތިހާބުގައި އިދިކޮޅުން މާލެ މޭޔަރު ކަމަށް ވާދަކުރައްވާ ކުރީގެ ހައުސިން މިނިސްޓަރ ޑރ.މުހައްމަދު މުއިއްޒު ބަލި ނުކުރެވޭނެކަން ރައީސް ނަޝީދަށް ކަށަވަރު ވެއްޖެކަމުގައި އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަދުރޭ މިހެން ވިދާޅުވީ އިންތިހާބުން މުއިއްޒު "ބަލި ވަންދެން" ބަންދު ނުކޮށް ބަހައްޓައި ދިނުމަކީ ވަރަށް ބޮޑު އެދުމަކާއި އުންމީދެއް ކަމަށް ރައީސް ނަޝީދު ވިދާޅުވުމާ ގުޅިގެންނެވެ.
އަދުރޭ މިރޭ ކުރެއްވި ޓްވީޓެއްގައި ވިދާޅުވީ މާލެސިޓީގެ މޭޔަރުކަމަށް ޕީ.ޕީ.އެމްގެ ޓިކެޓުގައި ވާދަ ކުރައްވާ ކުރީގެ ހައުސިންގ މިނިސްޓަރު އަދި ޕީ.ޕީ.އެމްގެ ނައިބް ރައީސް މުއިއްޒު ބަލި ނުކުރެވޭނެކަން ރައީސް ނަޝީދަށް ކަށަވަރު ވެއްޖެކަމަށެވެ.
“ކިތަންމެ ބިރެއް ދެއްކިޔަސް މުޢިއްޒު ފަހަކަށް ޖެހި ވަޑައެއް ނުގަންނަވާނެ. އިންޝާالله، މިއީ ޑރ.މުޢިއްޒުގެ ފަހަރު!” އަދުރޭގެ ޓްވީޓުގައި ވިދާޅުވިއެވެ.
މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ނަޝީދު ވިދާޅުވީ އިދިކޮޅު ފަރާތްތައް ބަންދުކޮށްފައި އިންތިހާބު ބޭއްވުމަކީ ގޯސް ކަމެއް ކަމަށެވެ.
އަދި އެއީ އެއްގޮތަކަށް ވެސް އެކަން ކޮށްގެން ވާނެ ގޮތް ނޫން ކަން ފާހަގަ ކުރައްވައި ނަޝީދު ވިދާޅުވީ އެކަން އެގޮތަށް ކުރާ ކަމަށް ދެކެވަޑައިނުގަންނަވާ ކަމަށެވެ.
ނަޝީދު ވިދާޅުވީ އިންތިހާބުން މުއިއްޒު "ބަލި ވަންދެން" ބަހައްޓަން ދިނުމަކީ ވަރަށް ބޮޑު އެދުމަކާއި އުންމީދެއް ކަމަށެވެ.
"ރައީސް ޔާމީން ހުންނެވީ ބަންދުގައި. ދެން މާލޭގެ މޭޔަރު ކަމަށް ކުރިމަތިލައްވާފައިވާ ބޭފުޅެއްގެ މައްޗަށް އަޅުގަނޑު ހިތުން މައްސަލައެއް އެބަ ބެލޭ. އަޅުގަނޑު އުންމީދު ކުރަން އެމްއެމްޕީއާރުސީގެ މައްސަލައިގައި ވިޔަސް އިންތިހާބުން ބަލިވަންދެން [މުއިއްޒު] ބަހައްޓާނެ ކަމަށް. އަޅުގަނޑު ވަރަށް ބޮޑަށް ބޭނުން ހައެއްކަ ވޯޓް ދީ މާލެއިން ބަލިކޮށްލަން. އަޅުގަނޑު ވަރަށް ބޮޑަށް އެދެން، އުންމީދު ކުރަން މުއިއްޒު ބަންދު ނުކޮށް ބަލި ވަންދެން، ބަލި ވަންދެން، އިންތިހާބު ނިމެންދެން ބަހައްޓާނެ ކަމަށް،" ނަޝީދު ވިދާޅުވި އެވެ.
ރައީސް ނަޝީދު މިހެން ވިދާޅުވެފައި ވީނަމަވެސް މުއިއްޒުގެ މައްޗަށް އުފުލާފައި ވަނީ ދޮގު ބަޔާން ދިނުމުގެ ދައުވާއެވެ. އެ މައްސަލަ ފޮނުވީ ޖޫން 14، 2020 ގައެވެ.
