ވެކްސިނާ ގުޅޭ ސައްޙަ ނޫން މަޢުލޫމާތު ތަކެއް ދައުރުކުރާ ދިވެހި ވެބްސައިޓެއް، ސަމާލުވޭ!
ކޮވިޑް-19ގެ ބަލި މަޑުކަމާއެކު މުޅި ދުނިޔެ މިވަނީ މަޑު ޖެހިފައެވެ. މިބަލި މަޑުކަމުން އަރައިގަނެވެން އޮތް ހަމައެކަނި ގޮތަކީ ކޮވިޑް-19 ވެކްސިނެވެ. މިހެންކަމުން ކޮވިޑް-19 ވެކްސިން ވީހާވެސް ގިނަ ބަޔަކަށް ޖެހުމަށްޓަކައި ވެކްސިނާ ބެހޭ ސައްޙަ މަޢުލޫމާތު އެނގުމަކީ މުހިންމު ކަމެކެވެ.
ވެކްސިނާ ދެކޮޅަށް ދުނިޔޭގައި މަސައްކަތް ކުރާ ޖަމިއްޔާއެއް އޮވެއެވެ. މިމީހުން ބުނާ ގޮތުން ވެކްސިނަކީ ނުރައްކާތެރި އެއްޗެކެވެ. އަދި އެއީ ދުނިޔޭގެ އާބާދީ ކޮންޓްރޯލް ކުރުމުން، ބާރުގަދަ ފަރާތްތަކުން ނިކަމެތިންނަށް ޖަހަމުން އަންނަ އެއްޗެއް ކަމަށްވެސް މިބައިމީހުން ބުނެއެވެ. ހަގީގަތެއް ނެތް މިފަދަ ވާހަކަތައް ދައްކާ ބަޔަކު ރާއްޖޭގައި ވެސް އުޅެއެވެ. މިގޮތުން މީގެ ކުރިން މިފަދަ ވާހަކަތައް ދައްކާ ދިވެހި ވައިބާ ގްރޫޕެއް ވަނީ ބޭންކޮށްލާފައެވެ.
ކޮވިޑް-19ގެ ވެކްސިން ބައެއް ޤައުމުތަކުގައި މިހާރު ޖަހަން ފަށާފައިވާއިރު، ރާއްޖޭގައި ކޮވިޑް-19ގެ ވެކްސިނާ ދެކޮޅަށް ކެންޕެއިން ހަރަކާތެއް ކުރިޔަށް އެބަގެންދެއެވެ. ކޮވިޑް-19 ވެކްސިނަކީ ރައްކާތެރި އެއްޗެއް ނޫން ކަމަށާއި އެއީ ޖަހަން ހެޔޮވާވަރު އެއްޗެއް ނޫންކަމަށް ބުނެ، ވެބްސައިޓެއްގައި ލިޔުންތަކެއް ދަނީ ޝާއިއު ކުރަމުންނެވެ. އަދި ޓެލެގްރާމް ޗެނަލްއަކުން މިމަޢުލޫމާތު ދަނީ ގިނަ މީހުންނާ ހިއްސާ ކުރަމުންނެވެ. މި ގްރޫޕްގައި 200 އަށްވުރެ ގިނަ މީހުން ތިބިކަން ފާހަގަ ކޮށްލެވެއެވެ.
"މަގޭ ހަށިގަނޑު، މަގޭ ޞިއްޙަތު، މަގޭ އިޚްތިޔާރު، މަގޭ މިނިވަންކަން" މިޝިއާރުގެ ދަށުން މި ވެބްސައިޓް ހިނގަމުން އަންނައިރު، އެވެބްސައިޓްގައިވާ ގޮތުން، އެއީ، އަމިއްލަ ހަށިގަނޑުގެ މިނިވަންކަމަށް ވަކާލާތުކޮށް އަމިއްލަ ހަށިގަނޑުގެ މިނިވަންކަމާއި ބާރުވެރިކަން ދަމަހައްޓައި ޙިމާޔަތް ކުރުމަށްޓަކައި މިނިވަންކަމާއެކު ޚިޔާލު ފާޅުކުރަން ނުކުމެތިބި ދިވެހި އިއްތިހާދެކެވެ.
މި ވެބްސައިޓްގެ ލިންކް "ދެން" އަށް ލިބިފައިވީ ނަމަވެސް، ވެބްސައިޓް އިތުރަށް ޕްރޮމޯޓް ވެދާނެތީ، ވެބްސައިޓްގެ ހާމަ ނުކުރަން ވަނީ ނިންމާފައެވެ.
