"ވިސްނާ" ޖަލްސާ އާ ގުޅިގެން އިދިކޮޅު ލީޑަޝިޕް ފުލުހަށް ހާޒިރު ކުރަނީ
އިދިކޮޅު ޕްރޮގްރެސިވް ކޮންގްރެސް ކޯލިޝަނުން މާލޭގައި ބާއްވަން ނިންމާފައިވާ "ވިސްނާ" ޖަލްސާއާ ގުޅިގެން އެ ކޯލިޝަންގެ ލީޑަޝިޕް ބޭފުޅުން ފުލުހަށް ހާޒިރުވާން އަންގައިފިއެވެ.
"ދެން" އަށް މަޢުލޫމާތު ލިބިފައިވާ ގޮތުގައި އިދިކޮޅު ލީޑަޝިޕް ބޭފުޅުން މިއަދު ހަވީރު 3:00 ގައި ފުލުހަށް ހާޒިރުވުމަށް ވަނީ އަންގާފައެވެ. މިކަމާ ބެހޭ ގޮތުން ފުލުހުން އަދި ވަކި އެއްޗެއް ހާމައެއް ނުކުރެއެވެ.
އިދިކޮޅު ފަރާތްތަކުން ޖަލްސާ ބޭއްވުމަށް މަސައްކަތް ކުރަނީ އަންނަ ހޮނިހިރު ދުވަހު ކާނިވާ ސަރަހައްދުގައެވެ. "ވިސްނާ" ޖަލްސާ ކާނިވާ ސަރަހައްދުގައި ބޭއްވުމަށް ހުއްދައަށް އެދި ކަމާ ބެހޭ ފަރާތްތަކަށް ސިޓީ އެއް ވަނީ ފޮނުވާފައެވެ. އެހެން ނަމަވެސް އަދި މިހާތަނަށް އެ ޖަލްސާ ބޭއްވުމަށް ހުއްދަ ދިން ކަމެއް ސާފެއް ނޫނެވެެ.
އިދިކޮޅުން 3 ޖަހާއިރު ފުލުހަށް ހާޒިރުވާން އަންގާފައިވާއިރު، މިއަދު 4 ޖަހާއިރު ނޫސްވެރިންގެ ބައްދަލުވުމެއް ބޭއްވުމަށް ވެސް އިދިކޮޅުން ވަނީ ތާވަލު ކޮށްފައެވެ.
