ކުއްލި ހާލަތު އުވާނުލެވޭތީ ޤާނޫނު އިސްލާހު ކޮށްދޭން އީސީއިން އެދިއްޖެ
އަންނަ އަހަރަށް ފަސްކޮށްފައިވާ ކައުންސިލް އިންތިހާބު ބޭއްވުމަށް ހުރަހަކަށް ވެފައިވާ ސިއްހީ ކުއްލި ނުރައްކަލުގެ ހާލަތު އުވާލައިފިނަމަ، ރާއްޖޭގައި ކޮވިޑް-19 ފެތުރުން ކޮންޓްރޯލް ކުރަން އުނދަގޫވާނެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފައިވާތީ، އިންތިހާބު ފަސްކުރަން ރައްޔިތުންގެ މަޖިލީހުން ފާސްކޮށްފައިވާ ގާނޫނު އިސްލާހު ކޮށްދިނުމަށް އިންތިހާބު ތަކާ ބެހޭ މަރުކަޒު ކަމަށްވާ އިލެކްޝަންސް ކޮމިޝަންސް (އީސީ)އިން އެދިއްޖެއެވެ.
މިއަހަރުގެ އޭޕްރިލް މަހު ބޭއްވުމަށް ތައްޔާރުވި ލޯކަލް ކައުންސިލް އިންހާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިހާބު ފަސްކޮށްފައި ވަނީ ކޮވިޑް-19 ގެ ބަލިމަޑުކަމާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނު ކުރުމުންނެވެ.
އެގޮތުން އެއިންތިހާބު ފަސްކުރުމާ ގުޅިގެން އުފެދިފައިވާ ގާނޫނީ މައްސަލަތަކަށް ހައްލު ހޯދުމަށް މަޖިލީހުން ވަނީ ސަންސެޓް ގާނޫނެއް ފާސް ކޮށްފައެވެ. އެ ގާނޫނުގައި ބުނާ ގޮތުންނަމަ، ގާނޫނު ތަސްދީގު ކުރާތާ އަހަރު ދުވަސްތެރޭ އިންތިހާބު ބާއްވަން ޖެހެއެވެ. އެހެންކަމުން އަންނަ އަހަރުގެ މެއި މަހުގެ ނުވަވަނަ ދުވަހުގެ ކުރިން އިންތިހާބު ބާއްވަން ޖެހެއެވެ.
ލޯކަލް ކައުންސިލު އިންތިހާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިހާބު މިހާރު ބާއްވަން ލަފާކޮށްފައި ވަނީ އަންނަ އަހަރުގެ މާޗް މަހުގައި ކަމަށް ވާއިރު އީސީން ތަކުރާރުކޮށް ބުނަމުން އަންނަނީ އަންނަ ޖެނުއަރީ ފަސް ވަނަ ދުވަހު ސިއްހީ ކުއްލި ނުރައްކަލުގެ ހާލަތު އުވާ ނުލައިފިނަމަ އިންތިހާބު ނުބޭއްވޭނެ ކަމަށެވެ.
ނަމަވެސް އެޗްޕީއޭ އިން ތަކުރާރުކޮށް ބުނަމުން އަންނަނީ ސިއްހީ ކުއްލި ނުރައްކަލުގެ ހާލަތު އުވާލެވޭނެ ތާރީހެއް އަދި ބުނަން ނޭނގޭ ކަމަށެވެ.
