އިންސާނާއާ އެންމެ ކައިރީގައިވާ އެއްޗަކީ އަދި އިންސާނާ އެއެއްޗަކާ އެންމެ ދުރަށް ދުވެފައި ދާ އެއްޗަކީ ވެސް މަރުު: ހުތުބާ
اللهގެ ޒާތުފުޅު ފިޔަވައި ދުނިޔޭގައި ވާހާ ހަމަ ކޮންމެ އެއްޗެއް ނެތި ފަނާވެގެން ދާނެ ކަމީ އަޅުގަނޑުމެން އެންމެންވެސް ގަބޫލު ކުރާ ކަމެކެވެ. އަޅުގަނޑުމެން އެންމެންގެ ވެސް ހަޔާތަށް ނިމުމެއް އެބައޮތްކަން އަޅުގަނޑުމެންނަށް އެނގެއެވެ. އަޅުގަނޑުމެންނަކީ މި ދުނިޔެއަށް ދަތުރުވެރިން ފަދަ ބައެއް ކަމާއި ފުރައިގެން ދާން ޖެހޭ ކަން ވެސް ދަނެއެވެ. ސުވާލަކީ މަރަށް އަޅުގަނޑުމެން ތައްޔާރީ ކިހާވަރަކަށް ތޯއެވެ. މިއަދުގެ ހުކުރު ހުތުބާގައި އަލިއަޅުވާލައިފައިވާ މައުޟޫއު އަކީ “މަރު ހަނދާންކުރުން” މިއެވެ.
الله ތަޢާލާ އިންސީންނާއި ޖިންނީން ޚަލްގު ކުރައްވާފައިވަނީ ވަރަށް މަތިވެރި މާތް މަޤުސަދަކަށް ޓަކައި ކަަމަށާއި އެއީ ހަމައެކަނި އެކަލާނގެ އެންގެވި ގޮތުގެ މަތީން ހަޔާތުގެ ދުވަސްތައް ހޭދަކުރުން ކަމަށް ހުތުބާގައި ފާހަގަ ކުރިއެވެ. الله ތަޢާލާ މި ދުނިޔެ ލައްވާފައިވަނީ އާޚިރަތް ބާއްޖަވެރި ކުރުމަށްޓަކައި މަސައްކަތް ކުރާނެ މައިދާނެއް ކަމުގައި ކަމަށް ވެސް ހުތުބާގައި ބުންޏެވެ.
“اللهގެ ޒާތުފުޅު ފިޔަވައި ބިންމަތީގައިވާ ކޮންމެ އެއްޗަކީ ފަނާވެ ނެތި ހިނގައިދާނެ އެއްޗެކެވެ. އަދި ދިރުއް ލައްވާފައިވާ ކޮންމެ އެއްޗަކަށް اللهތަޢާލާ މަރުގެ ނިޔާ ކަނޑަ އަޅުއްވާފައިވެއެވެ.
މީގެ އިތުރުން ކިތައްމެ ބޮޑު މުއްސަނޖަކަށް ވިޔަސް ފަގީރަކަށް ވިޔަސް އަދި ބޮޑު މީހަކަށް ވިޔަސް ކުޑަކުއްޖަކަށް ވިޔަސް އަދި ކިތަންމެ ދިގު މުއްދަތަކަށް ދުނިޔޭގައި އުޅުނަސް އަދި ކިތަންމެ ވަރުގަދަ ތަނެއްގައި ބަންދުވެގެން ހުރި ކަމުގައި ވިޔަސް އެމީހަކު މަރުން ސަލާމަތެއް ނުވާނެ ކަމަށް ހުތުބާގައި ބަޔާން ކޮށްފައިވެއެވެ. އަދި އިންސާނާއާ އެންމެ ކައިރީގައިވާ އެއްޗަކީ އަދި އިންސާނާ އެއެއްޗަކާ އެންމެ ދުރަށް ދުވެފައިދާ އެއްޗަކީ ވެސް މަރު ކަމުގައި ހުތުބާގައި ބުންޏެވެ.
ގިނަގިނައިން މަރު ހަނދާން ކުރުމަށް ރަސޫލާ ވަނީ އުންމަތަށް އިރުޝާދު ދެއްވާފައި ކަމަށާއި މުއުމިނު އަޅާ ގިނަގިނައިން މަރުމަތިން ހަނދާން ކުރާ ނަމަ، ތައުބާ ވުމަށް އަވަސްވެ ގަތުމާއި، ފުދުންތެރިކަމާއި އަޅުކަން ކުރުމުގެ ޝައުގުވެރިކަން އެމީހަކަށް اللهތަޢާލާ މިންވަރު ކުރައްވާނެ ކަމަށް އިލްމުވެރިން ވިދާޅުވާ ކަމުގައި ހުތުބާގައި ބުންޏެވެ. އަދި މަރުމަތިން ހަނދާން ކުރުން ދޫކޮށްލައިފި ނަމަ، ތައުބާވުން ލަސްވުމާއި ދަހިވެތިކަން އިތުރުވުމާއި އަޅުކަމުގައި ކަންނެތްކަން އޭނާގެ މައްޗަށް ވެރިވެދޭ ކަމަށް ވެސް ބުނެފައިވެއެވެ.
