ބްރޮކޮލީ: ފަލަވުމުން ދުރުކޮށްދިނުމުގެ އިތުރުން އެތައް ފައިދާތަކެއް ލިއްބައިދޭ ތަރުކާރީއެއް!
ބްރޮކޮލީ އަކީ އަޅުގަނޑުމެންނަށް އާ އެއްޗެއް ނޫނެވެ. ނަމަވެސް އޭގެ ރަހައަކީ އަޅުގަނޑުމެންނަށް އާންމު ރަހަ އެއް ނޫނެވެ. ތަރުކާރީ އެއް ނަމަވެސް ގިނަބަޔެއްގެ މެދުގައި ބްރޮކޮލީ އަކީ މީރު އެއްޗެއް ނޫނެވެ. ނަމަވެސް މިއީ ބައެއް މީހުންނަށް ވަރަށް ކަމުދާ އެއްޗެކެވެ. އެގޮތުން ބްރޮކޮލީ އަދި އެހެން ތަރުކާރީ އަޅައިގެން ރިހަ ކައްކައިގެން ވެސް ކައި އުޅެއެވެ. އަދި ފެނު ކައްކައިގެން ވެސް ބްރޮކޮލީ ކައި އުޅެއެވެ.
ކޮންމެ އަކަސް މިއީ ވެސް އަޅުގަނޑުމެންގެ ސިއްހަތަށް ނުހަނު ފައިދާ ހުރި އެއްޗެކެވެ. މި ބަލާލަނީ ބްރޮކޮލީ އިން ލިބޭ 4 ފައިދާ އަކަށެވެ.
1. ބަރުދަން ލުއިކުރުމަށް އެހީއެއް
ބްރޮކޮލީ އަކީ ގިނަ އަދަދަކަށް ފައިބަރ އެކުލެވޭ ތަރުކާރީއެކެވެ. އޭގެ ސަބަބުން ކާތަކެތި ހަޖަމްވުން ގޮތް ލަސްވެ ގިނައިރު ވަންދެން ބަނޑުހައި ނުވެ ހުރެއެވެ. އޭގެ ސަބަބުން ބަރުދަން ލުއިކުރުމަށް އެހީ ވެއެވެ.
2. އާދަޔާޚިލާފަށް ފަލަވުމުން ދުރުކޮށްދޭ
އޮރެންޖާއި ލުނބޯ އަކީ ވިޓަމިންސީ ލިއްބައިދޭ ކަމަށް އަޅުގަނޑުމެން އެންމެންގެ ތެރޭގައި ވެސް މަޝްހޫރުވެފައިވާ ދެއެއްޗެވެ. މި މޭވާ ތަކެކޭ އެއްފަދައިން ބްރޮކޮލީ އަކީ ވެސް ގިނަ އަދަދަކަށް ވިޓަމިން ސީ އެކުލެވޭ އެއްޗެކެވެ. އެހެންކަމުން ގިނައިން ބްރޮކޮލީ ކެއުމަކީ އާދަޔާ ޚިލާފަށް ފަލަވުމުން ދުރުކޮށްދޭ އެއްޗެކެވެ. އަދި މިކަން ވަނީ ދިރާސާތަކުން ސާބިތު ވެފައެވެ.
3. ދުޅަހެޔޮ ސިއްހަތެއްގައި ހުރުމަށް އެހީވެދޭ
ބްރޮކޮލީ އިން ލިއްބައިދޭ ވިޓަމިންސީގެ ސަބަބުން ހަށިގަނޑުގެ މަސްތައް ވަރުގަދަ ވެއެވެ. އަދި ހަށިގަނޑުގައި އުފެދޭ ޓިޝޫތައް ހަލާކު ވުމުގެ ހިރާސް ކުޑަވެއެވެ . ޔުނިވާސިޓީ އޮފް މެރިލޭންޑް މެޑިކަލް ސެންޓަރ އިން ހާމަކުރާ ގޮތުގައި ބްރޮކޮލީ އަކީ ހަށިގަނޑަށް ލިބޭ ގެއްލުންތައް އަވަހަށް ރަނަގަޅު ކޮށްދޭ އެއްޗެކެވެ. އަދި ދަތްތަކާއި ކަށިތައް ވަރުގަދަކޮށްދޭ އެއްޗެއްވެސް މެއެވެ.
4. ކެންސަރު ޖެހުމުން ދުރުކޮށްދޭ
ބްރޮކޮލީ ނިސްބަތްވާ ގަހުގެ ބާވަތް ކަމަށްވާ ބަރަސިކާ އަކީ ކެންސަރު ޖެހުމުން ދުރުކޮށްދޭ ބާވަތެކެވެ. އެހެންކަމުން ބްރޮކޮލީ ކެއުމަކީ ކެންސަރު ޖެހުމުން ދުރުކޮށްދޭ އެއްޗެކެވެ. އަދި އޭގައި ހިމެނޭ ވިޓަމިންސީ އާއި ފައިބަރ ގެ ސަބަބުން ވެސް ކެންސަރު ބަލިން ރައްކާތެރިވެ ހުރުމަށް މަގުފަހި ވެއެވެ.
Ads by STO
