ޚާއްސަ އެހީއަށް ބޭނުންވާ ކުޑަކުއްޖަކާ ބެހުނު މައްސަލަ ހައިކޯޓުން ބޭރުކޮށްލުމުން، ސުޕްރީމް ކޯޓަށް ހުށަހަޅައިފި
ޚާއްސަ އެހީއަށް ބޭނުންވާ ކުޑަކުއްޖަކަށް ޖިންސީ ގޯނާ ކުރިކަމުގެ މައްސަލައެއްގައި، އެކުއްޖާއަކީ ބުއްދީގެ ތަސައްރަފު ނުފުދޭ ކުއްޖެއްކަން ޝަރީއަތަށް ސާބިތު ކޮށްދޭފަދަ ލިޔުމެއް ހުށަހަޅާފައި ނުވާތީ އެ މައްސަލަ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމި ނިންމުމަކަށް ހައިކޯޓުން ތާއީދުކޮށް، އެމައްސަލަ އެކޯޓުން ވެސް ބޭރުކޮށްލުމުން، ދައުލަތުގެ ފަރާރުން އެމައްސަލަ ސުޕްރީމް ކޯޓަށް ހުށަހަޅައިފިއެވެ.
މިކަން އިއުލާނު ކުރައްވަމުން ޕްރޮސެކިއުޓާ ޖެނެރަލް (ޕީޖީ) ޙުސެއިން ޝަމީމު މިރޭ ކުރެއްވި ޓްވީޓެއްގައި ވިދާޅުވެފައިވަނީ، އެމައްސަލަ ނިމުނު ގޮތާމެދު ހިތްހަމަ ނުޖެހޭތީ، އެމައްސަލަ ސުޕްރީމް ކޯޓަށް ހުށަހަޅާފައިވާ ކަމަށެވެ. އަދި ހުށަހެޅި ލިޔުމާމެދު ސުވާލެއް، ދެބަސްވުމެއް ވެސް ނެތްކަން ޕީޖީ ޝަމީމް ފާހަގަ ކުރެއްވިއެވެ.
ޝަރުޢީ ގޮތުން ކުޑަކުދިން ކަމުގައި ބެލެވެނީ އުމުރުން 18 އަހަރުން ދަށުގެ ކުދިންނެވެ. ނަމަވެސް ހާއްސަ އެހީއަށް ބޭނުންވާ ކުދިންގެ ތެރެއިން 18 އަހަރު ފުރިފައި ވިޔަސް، ބުއްދީގެ ތަސައްރަފު ނުފުދޭ ކުދިންނާއި މީހުން ހިމެނެއެވެ.
މީގެ އިތުރުން ޖިންސީ ގޯނާ ލިބުނު ކުއްޖާއަކީ ހާއްސަ އެހީއަށް ބޭނުންވާ 18 އަހަރުން މަތީގެ ކުއްޖެއް ނަމަ އެ ކުއްޖާއަކީ ބުއްދީގެ ތަސައްރަފު ނުފުދޭ ކުއްޖެއްކަން ޝަރީއަތަށް ސާބިތު ކޮށްދޭފަދަ ސަރުކާރުގެ ކަމާބެހޭ އިދާރާއެއްގެ ރަސްމީ ލިޔުމެއް ނުވަތަ ސަރުކާރު ގަބޫލުކުރާ އެހެން އިދާރާއެއްގެ ލިޔުމެއް ދައުލަތުގެ ފަރާތުން ޝަރީއަތަށް ހުށަހަޅަން ޖެހޭ ކަމަށް ކުޑަކުދިންނަށް ޖިންސީ ގޯނާ ކުރާ މީހުންނާ މެދު ހާއްސަ އުސޫލުތަކުން އަމަލު ކުރުމުގެ ގާނޫނުގައި ވެއެވެ.
އެނގިފައިވާ ގޮތުގައި މި މައްސަލައަކީ އުމުރުން 18 އަހަރަށް ވުރެ މައްޗަށް ގޮސްފައިވާ ހާއްސަ އެހީއަށް ބޭނުންވާ ކުއްޖަކަށް އޭނާގެ ޅިޔަނު ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެކެވެ. ނަމަވެސް، އެ މައްސަލައިގައި އެކުއްޖާއަކީ ބުއްދީގެ ތަސައްރަފު ނުފުދޭ ކުއްޖެއްކަން ޝަރީއަތަށް ސާބިތު ކޮށްދޭފަދަ ލިޔުމެއް ދައުލަތުން ހުށަހަޅާފައި ނުވާ ކަމަށް ބުނެ ކްރިމިނަލް ކޯޓުން ވަނީ ޝަރީއަތް ފެށުމުގެ ކުރިން މައްސަލަ ކޯޓުން ބޭރުކޮށްލައި ފައެވެ.
ނަމަވެސް ދައުލަތުގެ ފަރާތުން އެމައްސަލަ ހައިކޯޓުގައި އިސްތިއުނާފު ކުރުމުން، މިދިޔަ ބުރާސްފަތި ދުވަހު ބޭއްވި އަޑުއެހުމުގައި، ހައިކޯޓުން ވަނީ ކްރިމިނަލް ކޯޓުގެ އެނިންމުމަށް ތާއީދު ކޮށްފައެވެ.
