އިދިކޮޅު މުޒާހަރާގެ ތެރެއިން ހަ މީހަކު ހައްޔަރުކޮށްފި
އިދިކޮޅު އެއްވުމުގެ ތެރެއިން ހަ މީހަކު ހައްޔަރު ކޮށްފިއެވެ.
ކްރިމިނަލް ކޯޓު ސަރަޙައްދުގައި އިދިކޮޅު ކޯލިޝަނުން މުޒާހަރާ ކުރިޔަށް ގެންދަނީ، މިއަދު އެ ކޯޓްގައި ކުރިއަށްދާ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޝަރީއަތާ ދިމާކޮށެވެ.
އެއްވުމުގެ ތެރެއިން ހަ މީހަކު ހައްޔަރު ކޮށްފައިވާއިރު އޭގެ ތެރޭގައި ޕީޕީއެމް ކައުންސިލްގެ ތިން މެންބަރަކު ވެސް ހިމެނެއެވެ. މިކަމާ ގުޅިގެން ފުލުހުން އަދި ވަކި އެއްޗެއް ހާމަކޮށްފައެއް ނުވެއެވެ.
އެމްއެމްޕީއާރްސީގެ ޚިޔާނާތާ ގުޅިގެން ދައުލަތުން ވަނީ ރައީސް ޔާމީންގެ މައްޗަށް ދެ ދައުވާއެއް ކޮށްފައެވެ. އެއީ މަނީ ލޯންޑަރިންގެ ދައުވާއާއި ރ. ފުއްގިރި ދޫކުރުމުގައި ކުރެވުނު މުއާމަލާތުގައި ރިޝްވަތު ގަބޫލުކުރުމުގެ ދައުވާއެވެ.
މަނީ ލޯންޑަރިންގެ ކުށް ސާބިތުވާ ކަމަށް ކަނޑައަޅާ އެމަނިކުފާނު މިހާރު ވެސް ގެންދަވަނީ ފަސް އަހަރާއި ހަ މަސް ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ.
ރައީސް ޔާމީންގެ ސަޕޯޓަރުންނާއި، އިދިކޮޅު ޕީޕީއެމް/ޕީއެންސީއިން ބުނަމުންދަނީ އެމަނިކުފާނަށް ކުރަމުން ދަނީ ނުހައްގު ދައުވާތަކެއް ކަމަށާއި މި ސަރުކާރުން އެމްއެމްޕީއާރުސީގެ ހިޔާނާތް ތަހުގީގު ނުކުރާ ކަމަށެވެ. އަދި ހަމައެކަނި މިސަރުކާރުގެ ބޭނުމަކީ ރައީސް ޔާމީނަށް އަނިޔާ ކުރުން ކަމަށް ވެސް އިދިކޮޅުން ބުނެއެވެ.
