ކެޔޮގަނޑު ކަނޑާލީމާ ގަހުގެ ބޭނުމެއް ނެތޭ ބުނެ ރަހުމަތްތެރިން ދުރުކޮށްނުލާ!
ބައެއް މީހުންނަކީ ދުނިޔޭގައި އުޅޭއިރު އެހެން މީހުން މާ ގާތް ކޮށްގެން އުޅެން ބޭނުން ނުވާ މީހުންނެވެ. އަދި އެމީހުންގެ މާގިނަ ރައްޓެހިންތަކެއް ނުތިބޭއިރު، އެމީހުންނަކީ މީހުންނާ މާ ގުޅޭ ބަޔަކަށް ވެސް ނޫޅެއެވެ. އެހެން ބައެއް ފަހަރަށް ދިމާވަނީ އެމީހުންނަށް ދިރިއުޅުމުގައި ދިމާވެފައިވާ ކަންކަމުގެ ސަބަބުންނެވެ. ދިމާވެފައިވާ ކަމެއްގެ ސަބަބުން އެއްވެސް މީހަކަށް އިތުބާރު ކުރަން ބޭނުން ނުވަނީއެެވެ.
ތެދެކެވެ. ކާންދޭ އަތުގައި ދަތްއަޅާފައި ދިއުމުން، އެވާ ތަދު އެނގޭނީ އެ ތަދު އިހުސާސް ކޮށްފައިވާ މީހަކަށެވެ. އެކުގައި އުޅޭ ރަހުމަތްތެރިއަކު ބޭވަފާތެރިވުމުން އެވާ ދެރަ ވެސް އެނގޭނީ ހަމަ އެކަން އިހްސާސް ކޮށްފައިވާ މީހަކަށެވެ. ކޮންމެއަކަސް، ދިރިއުޅުމުގެ ކޮންމެވެސް ހިސާބަކުން ކޮންމެ މީހަކަށް ވެެސް މިފަދަ ކަންތައްތަކާ ކުރިމަތިލާން ޖެހޭ ފަހަރު އޮންނަނީ އައިސްފައެވެ.
ވަރަށް ގިނައިން އަޑު އިވޭ ވާހަކަ އަކަށް ވާތީ މިފަހަރު ދައްކާލަން މިއުޅެނީ، ކަމެއް ޖެހުނީމާ ގުޅޭ ނުވަތަ ހަބަރުވާ ރައްޓެހިންގެ ވާހަކައެވެ. އެފަދަ މީހުންނަކީ ހަމަ ހަގީގަތުގައި ވެސް ރަހުމަތްތެރިންތޯ އަހަރެމެން އަމިއްލަ ނަފްސާ ސުވާލު ކޮށްލަން އެބަޖެހެއެވެ. ހަގީގަތުގައި އެ ސުވާލު ކޮށްލުމުން ގިނަ ބަޔަކު އެއީ ވެސް ދެން ރަހުމަތްތެރިންނޭ ޒާތަކަށް ބުނި ނަމަވެސް އެއީ ރަހުމަތްތެެރިންނެއް ނޫނެވެ. ރަހުމަތްތެރިންނަކީ އޭނާ ކަމެއް ބޭނުންވިޔަސް ނުވިޔަސް ތިބާގެ ހާލުބަލައި ހަދާ މީހުންނެވެ. ތިބާއަށް އަޅާލާ ތިބާއަށް ހެޔޮގޮތް ވުމަށް އެދޭ މަދަދުވެރިންނެވެ. ތިބާ ކަމެއް ބޭނުންވެއްޖެ ނަމަ ތިބާާއަށްޓަކައި ސާބިތުވެ ތިބާގެ ގާތުގައި ހިތްވަރުދޭން ތިބޭ މީހުންނެވެ.
ބައެއް ފަހަރަށް މީހުން އަނެކާއާ ގާތްވަނީ އެމީހެއްގެ ފަރާތުން ކަމެއް ބޭނުންވީމައެވެ، އެމީހެއްގެ ފަރާތުން އޭނާއަށް ކޮންމެވެސް މަންފާއެއް ކުރާނެތީއެވެ. ނަމަވެސް އެކަމެއްވެ ނިމުނީމާ އެއީ ދަންނަ މީހެއް ކަމަށް ވެސް ހަދާނުލާނޭ ބުނުމަކީ ދޮގަކަށް ނުވާނެއެވެ. ހާލު ބަލައިލާން ގޮވާ ނުލައި އިރު، މަގުމަތިން ފެނުނީމާ ނިތް އަރުވާލާނީ ވެސް ހިތަށް އެރިއްޔާއެވެ.
އެކުވެރިޔާއެވެ. ތިބާއަށް ކަމެއް ދަމެއް ބޮޑުވެއްޖެ ނަމަ ތިބާއަށް އަޅާލައި ތިބާގެ ގާތުގައި ހިތްވަރުދޭން ވެސް ތިބޭނީ ތިބާގެ އާއިލާ އާއި ރަހުމަތްތެެރީންނެވެ. އެހެންކަމުން ތިބާއަށް ކަމެއް ޖެހުމުން އެކަނި އެމީހުންނަށް ހަބަރުވުން އެބަ ހުއްޓާލަން ޖެހެއެވެ. ތިބާގެ ފަރާތުން އެމީހުންވެސް އެހީއަށް ބޭނުންވެފައި ތިބެދާނެއެވެ. އަދި ތިބާގެ ފޯން ކޯލަކަށް ނުވަތަ މެސެޖަކަށް އިންތިޒާރު ކޮށްގެން ވެސް ތިބެދާނެއެވެ,
މުސްކުޅިން ބުނެ އުޅޭ މިސާލު ބަހެއްގައި އޮވެއެވެ. ހަކުރު ދެންޏާ ބޮޑުބޭބެއެވެ. މީހަކު އެއްޗެއް ދެންޏާ ނުވަތަ މީހެއްގެ ފަރާތުން މަންފާއެއް ހާސިލްވަންޏާ އެމީހަކާ އެކުގައި އުޅޭ މީހުން ގިނަވާނެއެވެ، އެކުގައި ކޮފީއަށް އަރައި އުޅޭ މީހުން ވެސް ގިނަ ވާނެއެވެ. އެހެނަސް އެއީ ހަގީގީ ރަހުމަތްތެރިކަމެއް ނޫނެވެ. ހަގީގީ ރަހުމަތްތެރިކަމަކީ އެއަށްވުރެ މާ އަގުހުރި އެއްޗެކެވެ. އެހެންކަމުން، ތިބާ ބޭނުންވާ ކަމެއް ފުދުމުން ކެޔޮގަނޑު ކަނޑާލީމާ ގަހުގެ ބޭނުމެއް ނެތޭ ބުނެ ތިބާގެ ރަހުމަތްތެރިޔާ ދުރުކޮށްނުލާާށެވެ.
