ރައީސް ޔާމީންއާ މެދު އަމަލު ކުރަނީ ނާސިރުއާ މެދު އަމަލު ކުރި ގޮތަށް: އާދަމް ޝަރީފް
މި ސަރުކާރުން ، ކުރީގެ ރައީސް އަބްދުﷲ ޔާމީން އާ މެދު އަމަލު ކުރަނީ، ކުރީގެ ރައީސް އަލްމަރްހޫމް އިބްރާހިމް ނާސިރާ މެދު އޭރުގެ ސަރުކާރުން އަމަލުކުރި ގޮތަށް ކަމަށް މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބު ރައީސް އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވީ ރައީސް ޔާމީންގެ އާމްދަނީއާ ނުބައްދަލު ފައިސާއާއި މުދާ ދައުލަތަށް ނެގުމުގެ އަމުރަކަށް ދައުލަތުގެ ފަރާތުން އިއްޔެ އެދިފައިވުމާ ގުޅިގެން ކުރެއްވި ޓްވީޓެއްގައެވެ.
އޭނާ ވިދާޅުވީ މަރްހޫމް ނާސިރުގެ މުދާ ވެސް ސަރުކާރަށް ނެގި ކަމަށާއި ނަމަވެސް ގައުމަށްވީ ފައިދާއެއް އަދި ރައްޔިތުންނަށް ހާސިލު ކުރެވުނު އެއް ކަމެއް ވެސް ނެތް ކަމަށެވެ.
"ޔާމީނާ މެދު އަމަލު ކުރަމުން ދަނީ ނާސިރާ މެދު އަމަލުކުރި ގޮތަށް. ބަދަލު ހިފަނީ ސަރުކާރު ބަލިކަށިވާތީ އެކްޓިވިސްޓުން ރުއްސަން" އާދަމް ޝަރީފް ވިދާޅުވިއެވެ.
ރ. ފުއްގިރި ތަރައްގީ ކުރަން ކުއްޔަށް ދޫކުރުމުގެ މުއާމަލާތުގައި މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކޮށްފައިވާ ކަމަށް ތުހުމަތު ކުރާ މައްސަލައެއްގައި، ރައީސް ޔާމީންގެ މައްޗަށް ދައުލަތުން ވަނީ މަނީ ލޯންޑަރިންގާއި ރިޝްވަތު ޤަބޫލުކުރި ކަމުގެ ދައުވާ އުފުލާފައެވެ.
ކްރިމިނަލް ކޯޓުގައި އިއްޔެ ކުރިއަށްދިޔަ އަޑުއެހުމުގައި ދައުލަތުގެ ފަރާތުން ވަނީ، ރިޝްވަތު ޤަބޫލު ކުރުމުގެ ދައުވާ ރައީސް ޔާމީންގެ މައްޗަށް އިއްވާފައެވެ. އެދައުވާ އިއްވަވަމުން ދައުލަތުގެ ވަކީލާ ވިދާޅުވީ ރައީސް ޔާމީން ރިޝްވަތުގެ ގޮތުގައި ނެންގެވި ކަމަށް ބެލެވޭ 1،118،000 ޑޮލަރާއި އެމަނިކުފާނުގެ އާމްދަނީއާ ނުބައްދަލު ފައިސާ މުދާ ދައުލަތަށް ނެގުމުގެ އަމުރެއް ނެރެދިނުމަށް އެދިވަޑައިގަންނަވާ ކަމަށެވެ.
