ރާއްޖެއިން ދިޔުމަށްފަހު ކިއާރާ އެންމެ ފުރަތަމަ ވެސް ފެށީ ކަސްރަތު ކުރަން
ބޮލީވުޑްގެ ކުޅަދާނަ އެކްޓްރެސް ކިއާރާ އަދްވާނީ އާއި ސިދާތު މަލޯތުރާ މި އާ އަހަރު ފެށުނުއިރު ތިބީ ޗުއްޓީ ހޭދަ ކުރަން ރާއްޖޭގައެވެ.
ރީތި މޫދާއި ދޮންވެލި ބީޗުގެ މަންޒަރުތައް އޭނާގެ އިންސްޓަގްރާމްގައި ހިއްސާ ކުރަމުން، ކިއާރާ ވަނީ ރާއްޖެއަށް ވަރަށް ތަޢުރީފު ވެސް ކޮށްފައެވެ. އަދި މީގެ ދުވަސްކޮޅެއް ކުރިން އޭނާއާއި ސިދާތު ވަނީ އެނބުރި އިންޑިއާ އަށް ގޮސްފައެވެ.
ރިޕޯޓުތަކުން ބުނެފައިވާ ގޮތުގައި، ރާއްޖޭގައި ހޭދަކުރި ޗުއްޓީއަށްފަހު، ކިއާރާ އެންމެ ފުރަތަމަ ވެސް ދިޔައީ ޖިމް އަށެވެ. އެކަން އޭނާގެ އިންސްޓަގްރާމްގައި ވެސް ހިއްސާ ކުރަމުން ކިއާރާ ބުނީ، 2021 ވަނަ އަހަރަށް އޭނާ "ޗާޖު" ވަނީ ކަމަށެވެ.
ބަރު އުފުލަމުން އެކިކަހަލަ ކަސްރަތު ކުރާ ވީޑިއޯތަކެއް ކިއާރާ ހިއްސާ ކޮށްފައިވާއިރު، އޭނާގެ ހަށިގަނޑު ބަލަހައްޓާ ގޮތަށް އެތައް ބަޔަކު ވަނީ ތައުރީފު ކޮށްފައެވެ.
ފިލްމު "ކަބީރް ސިންގް" ގައި ޝާހިދު ކަޕޫރާއެކު ހަރަކާތްތެރިވެ، ބެލުންތެރިންގެ މެދުގައި ހޫނު ތަރުހީބެއް ހޯދާފައިވާ ކިއާރާ އެންމެ ފަހުން ހަރަކާތްތެރި ވެފައިވަނީ އަދިތުޔާ ސީލް އާއެކު "އިންދޫ ކީ ޖަވާނީ" ގައެވެ. މިދިޔަ އަހަރު މިފިލްމު ރިލީޒް ވެފައިވާއިރު ކިއާރާ ދެން އެންމެ އަވަހަށް ފެންނާނީ ސިދާތު އާއެކު "ޝޭރްޝާހް" އިންނެވެ. ރިޕޯޓުތަކުން ބުނާ ގޮތުގައި ކިއާރާ އާއި ސިދާތުގެ ލޯބީގެ ގޮތުން ގުޅިފައިވަނީ މިފިލްމުގެ ޝޫޓިންގ ތެރެއިންނެވެ. ނަމަވެސް އެކަން މި ދެތަރިން ވެސް އަދި ޔަގީން ކޮށްދީފައެއް ނުވެއެވެ.
