މަސްޖިދުލްޙަރަމްގެ އިމާމުކަމުގެ މަތިވެރި ޢިއްޒަތާއި ޝަރަފް ، ޝައިޚް ޣާމިދީ ދޫކޮށްލެއްވީ މާ މަތިވެރި ޝަރަފަކަށް ޓަކައި!

ދުނިޔޭގެ މަޝްހޫރު ޤާރީންގެ ތެރެއިން ސައުދީ ޢަރަބިއްޔާގެ ދައްމާމަށް އުފަން ، ސަޢަދު އަލްޣާމިދީއަކީ މަޝްހޫރު ބޭފުޅެކެވެ. އޭނާގެ ރީތި އަޑުން ކީރިތި ޤުރުއާންގެ މޫރިތި އާޔަތްތައް އިވިގެންދާއިރު ހިތްތައް މަޑުމޮޅިވެ ، ގައިން ހީބިހި ނަގައިގެން ދެއެވެ.

Ads by Sosun Fihaara

އުމުރުން 22 އަހަރުގައި ޤުރުއާން ހިތުދަސްކުރެއްވި މި ޤާރީގެ ރީތި އަދި މޮޅު ކިޔެވުމުގެ ސަބަބުން މައްކާގެ އަމީރު ޢަބުދުލްމަޖީދުގެ ފަރާތްޕުޅުން ޝައިޚް ޣާމިދީއަށް މަތިވެރި އަދި ފަޚުރުވެރި ދަޢުވަތެއް ދެ އަހަރަކު ލިބިވަޑައިގަތެވެ. އެއީ އެހެން މިސްކިތެއްގައި ކުރާ ނަމާދަކަށް ވުރެ އެ މިސްކިތެއްގައި ނަމާދު ކުރުމުން އެއްލައްކަ ދަރަޖައިގެ މަތިވެރި ޘަވާބާއި ދަރުމަ ލިބޭ ، މައްކާގެ މަސްޖިދުލްޙަރަމްގެ އިމާމަކަށް ވެވަޑައިގަތުމުގެ ދަޢުވަތެވެ. ކޮންފަދަ ޝަރަފަކާއި ނިޢުމަތެއްތޯއެވެ. ކޮންފަދަ ބޮޑު ޢިއްޒަތަކާއި މަތިވެރިކަމެއްތޯއެވެ.

އަމީރު ޢަބުދުލްމަޖީދުގެ މި ދަޢުވަތު ، ޝައިޚް ޣާމިދީ ދެ އަހަރު ވެސް ޤަބޫލުފުޅެއް ނުކުރެއްވިއެވެ. އޭނާ އެ ޝަރަފާއި މަތިވެރިކަމަށް އިންކާރު ކުރެއްވިއެވެ. ނަމަވެސް ދެމި ހުންނެވީ އެއަށް ވުރެ މަތިވެރި ޝަރަފުވެރި މަގާމެއްގައެވެ. އެއަށްވުރެ މާ ބޮޑު ޢިއްޒަތެއްގައެވެ.

އަމީރުގެ ދަޢުވަތު ޤަބޫލުފުޅު ނުކުރެއްވުމާ ގުޅިގެން ، ޝައިޚް ޣާމިދީއަށް ސުވާލު ހުށަހެޅުނެވެ. ދެ އަހަރު ވެސް އެ ދަޢުވަތަށް އިޖާބަ ނުދެއްވީ ކީއްވެތޯއެވެ.

އެ މަތިވެރިކަމަށް ފުރަގަސްދިން ސަބަބާ ގުޅޭ ގޮތުން ޝައިޚް ވިދާޅުވިއެވެ.

"އަމީރު ޢަބުދުލްމަޖީދު ބޭނުންވެ ވަޑައިގެންނެވި ، އަހަރެން މައްކާގެ އިމާމަކަށްވާން ، އަދި ބައެއް މީހުން އެދުނު އެ މަގާމާ ހަވާލުވާން ވެސް ،ނަމަވެސް އެކަން ކުރެވެން ނެތް ސަބަބަކީ ،ފުރަތަމަ ކަމަކަށް އަހަރެންނަކީ އެ މަގާމަށް ލާއިގުވެގެންވާ މީހެއް ނޫން ،ﷲ ގަންދީ ހުވާކޮށްފައި ބުނަން ،އެއީ އަހަންނަށް ލާއިގު މަގާމެއް ނޫން ، އެއީ ޝައިޚް ސުދައިސް ، ޝައިޚް ޝުރައިމް ފަދަަ ބޭފުޅުންނާ އެކަށޭނަ މަގާމެއް، ﷲ ތަޢާލާ އެ ބޭކަލުންނަށް ބަރަކާތް ލައްވާށި! (ދެވަނަ ކަމަކަށް) އަހަރެންގެ މައިންބަފައިން އަބަދުވެސް ބޭނުންވި އެމީހުންގެ ގާތުގައި އަހަރެން ހުރުމަށް ، އެހެންވެ އަހަރެން ނިންމީ އެ ގޮތް ، މައިންބަފައިންގެ ގާތުގައި ހުރުމަށް" މަޑުމައިތިރި ސާދާ މިޒާޖުގެ ޝައިޚް ޣާމިދީ ބުނެފައި ވެއެވެ.

ސުބުޙާނަﷲ އެވެ. މަތިވެރި ޝަރަފާ ޢިއްޒަތެއް ދޫކޮށްލުމަށް ފަހު ޣާމިދީ އެ އިޚްތިޔާރު ކުރެއްވީ މާ މާތް ، މާ މަތިވެރި ޝަރަފެކެވެ. އެއީ އެމީހެއްގެ ފައިތިލަ ދަށުގައި ޖަންނަތުވާ ،މައިމީހާއަށް ޚިދުމަތް ކުރުމުގެ ޝަރަފެވެ. އެއީ ﷲގެ މަގުގައި ޖިހާދަށް ނުކުތް ބައެއް މީހުން ހުއްޓުވައި އެމީހަކަށް ޚިދުމަތް ކުރުމަށް އަނބުރާ ދިޔުމަށް ، ނަބިއްޔާ ޞައްލަﷲ ޢަލައިހި ވަސައްލަމަ އަމުރު ކުރެއްވި މައިމީހާގެ ޝަރަފެވެ.