ލޯބިވިޔަސް އެދޭ ކޮންމެ ކަމަކަށް "އާނ ބަސް"' ބުނާކަށް ނުޖެހޭ!
މިއަދު އަހަރެމެންގެ މުޖުތަމައުގައި ފެންނަ މަންޒަރަކީ ހެޔޮވަރުގެ އިސްކޮޅަކަށް މީހާ ދެމިލާއިރަށް ލޯބީގެ ގޮތުން މީހަކާ ގުޅޭ މަންޒަރެވެ. ސްކޫލް ދައުރުގައި ވެސް ގިނަ ކުދިންގެ ވިސްނުމުގައި އެންމެ މުހިންމު ކަމަކީ އިޝްގީ ލޯތްބެވެ. ލޯބީގެ ވަބާގައި ޖެހި އާވާރާވެ، ކިޔެވުމާ ކުދިން ދުރުވާ މަންޒަރުވެސް ފެނެއެވެ. ކޮންމެއަކަސް ކޮންމެ މީހަކު ވެސް ލޯބީގެ ގޮތުން އަނެކާއާ ގުޅެނީ ފޮނި ހުވަފެންތަކެއް ދެކިގެންނެވެ. އެތައް ހާސް ވައުދުތަކާއި އަހުދުތަކެއް ކުރުމަށް ފަހުގައެވެ. އެތައް ހާސް ކަމަކަށް އަތުން، ފައިން އަދި ލޮލުން ބޮލުން ވެސް އެއްބަސް ވެގެންނެވެ.
މަންޒަރު ބަދަލު ވަނީ ވަކި ހިސާބަކުންނެވެ. ލޯބިވެރިޔާގެ އިޒްނަ ނުހޯދާ ބޭރަށް ނުކުމެވޭކަށް ނޯވެއެވެ. އިދިކޮޅު ޖިންސުގެ އެކުވެރިއަކާ ވާހަކަ ދައްކާލެވޭކަށް ނޯވެއެވެ. އާއިލާއާ އެކު ވަގުތު ހޭދަ ކުރެވޭކަށް ނޯވެއެވެ. ވަކި އެއްޗެއް ކެވޭކަށް ނުވަތަ ވަކި އެއްޗެއް ބޮވޭކަށް ނޯވެއެވެ. އަދި ވަކި ކަހަލަ ގޮތަކަށް ހެދުން އެޅުން ބެހެއްޓޭކަށް ނޯވެއެވެ. ސުވާލަކީ މިކަން މިހެން ވާން ޖެހެނީ ކީއްވެގެން ތޯއެވެ.
ލޯތްބަކީ އަޅުވެތިކަން ނޫން ކަން ހަަމަ އަހަރެމެން އެންމެންނަށް ވެސް އެނގެއެވެ. އެހެން ނަމަވެސް އެފަދަ މީހުން ގަބޫލު ކުރާ ގޮތުގައި އެމީހުންގެ ދުނިޔޭގައި އުޅޭނީ އެދެމީހުން އެކަންޏެވެ. އެދެ ލޯބިވެރިންގެ ދޭތެރެއަށް މީހަކު އައިސް ދެމީހުންގެ ގުޅުން "ފަނި" ކޮށްލަފާނެތީ ބިރު ގަންނަނީއެވެ. އެހެން ކަމުން އެހެން މީހުންނާއެކު ބައިވެރިޔާ އުޅުމަށް ވެސް ހުރަސް އަޅަނީއެވެ. އެއީ އާއިލާ މީހެއް ކަމުގައި ވިޔަސް ގާތް އެކުވެރިއެއް ކަމުގައި ވިޔަސް މެއެވެ.
އަބަދުވެސް ބައިވެރިޔާ ހުންނަން ޖެހޭނީ ތިމަންނާގެ ގާތުގައޭ ނުވަތަ ތިމަންނާއަށް ލޮލަށް ފެންނަ ހިސާބުގައޭ ހިތަށް އަރަނީއެވެ. ހަގީގަތުގައި މިޖެހޭ ބައްޔަކީ ވަރަށް ނުރައްކާތެރި ބައްޔެކެވެ. ޝައްކު ބައްޔެވެ. ޝައްކު ކުރަން ފަށައިފި ނަމަ އެގުޅުމެއް މާ ގިނަ ދުވަސްތަކެއް ވަންދެން ދެމި ނޯންނާނެ ކަމުގައި ލޯބީގެ މާހިރުން ބުނެ އުޅެނީ ސަބަބެއް ނެތިއެއް ވެސް ނޫނެވެ. އެހެނީ އިތުބާރާއި ނުލާ ލޯތްބެއް ބިނާ ނުކުރެވޭނެތީއެވެ.
ދުވަސްކޮޅަކުން ފެންނަނީ މިކިޔާ "އިތުބާރު" ވެސް އެހެން ގޮތަކަށް ބަދަލު ވެެގެން ދާ މަންޒަރެވެ. އިތުބާރު ކުރާ ނަމަ ބައިވެރިޔާއާ އެކު އެކަހެރިވެ "ގެސްޓް ހައުސް" ތަކަށް ދާން ޖެހެއެވެ. ފާޑުފާޑުގެ ފޮޓޯ ފޮނުވަން ޖެހެއެވެ. އަދި ނުވިތާކަށް ބައިވެރިޔާ އެދުނުހާ ކަމެއް ކޮށްދޭން ވެސް ޖެހެއެވެ. އޭގެ ސަބަބުން އާޚިރު ނަތީޖާ ވަނީ ނިޔަދުރުހާ ހިއްޗެވެ.
ދެމީހުން އެކަކު އަނެކަކަށް ވެފައިވާ ވައުދުތައް މަތިން ކޮންމެވެސް އެކަކު ހަނދާން ނެތެނީއެވެ. ޖެހޭ މައްސަލައެއްގެ ސަބަބުން އެކަކު އަނެކަކާ ދިމާއަށް ހިތުހުރިހާ އެއްޗެއް ގޮވަނީއެވެ. އެކަކު އަނެކަކަށް މިކިޔާ “އިހްތިރާމް” ވެސް އެ ދުވަހަކު ކުރާތަނެއް ނުފެނެއެވެ.
އަނެެއް ދުވަހު އިރު އަރާއިރު “އިތުބާރު” ކޮށްފައި ފޮނުވާ ފޮޓޯތައް ހުންނަނީ މީސްމީޑިއާގެ އެކި މަންސަތަކުގައެވެ. އެކި ޓެލެގްރާމް ގްރޫޕްތަކުގައެވެ. އާޚިރުގައި ހިތާމަކުރަން ޖެހެނީ މާ ބޮޑަށް އިތުބާރު ކުރެވުމުންނެވެ.
ލޯބި ވެސް ވާން ވާނެއެވެ. އެހެން ނަމަވެސް ދޮހޮއްކޮބޭގެ ލަވައެއްގައި ބުނާ ފަދައިން ހިތަަށް ކުޅަދާނަ މިންވަރަކުންނެވެ. އެ މިންވަރަކީ އެދޭ ކޮންމެ ކަމަކަށް އާނ ބަސް ނުބުނުމެވެ. ނޫން ނަމަ އާޚިރުގައި ހިތާމަ ކޮށް ކަރުނަ އަޅަން ޖެހިދާނެތީއެވެ.
