ސަރުކާރަށް ފާއިތުވެ ދިޔަ 2 އަހަރު ހާސިލު ކުރެވުނު ކާމިޔާބީތައް ސިފަކޮށްދިނުމަށް ސަޢިދު އެދިވަޑައިގެންފި
ސަރުކާރަށް ފާއިތުވެ ދިޔަ 2 އަހަރު ހާސިލު ކުރެވުނު ކާމިޔާބީތައް ސިފަކޮށްދިނުމަށް ޕީއެންސީގެ ނައިބުރައީސް އަދި މާވަށު ދާއިރާގެ ރައްޔިތުންގެ މަޖިލިހުގެ މެންބަރު މުޙައްމަދު ސަޢީދު އެދިވަޑައިގެންފިއެވެ.
ރައީސް އިބްރާހީމް މުޙައްމަދު ޞާލިހު "ދަ ހިންދޫ" ނޫހަށް އީމެއިލް މެދުވެރިކުރައްވައި ދެއްވި ބަސްދީގަތުމެއްގައި ވިދާޅުވި ވާހަކަފުޅަކަށް އިޝާރާތްކުރައްވައި ސަޢިދު ވަނީ މިފަދައިން ވިދާޅުވެ ޓުވީޓު ކުރައްވައިފައެވެ.
“ދަ ހިންދޫ” އަށް ރައީސް އިބްރާހިމް މުހައްމަދު ޞާލިހު ދެއްވި ބަސްދީގަތުމުގައި ވިދާޅުވެފައިވަނީ، ސަރުކާރުގެ ސިޔާސަތުތަކުގެ ހުރިހާ ދާއިރާއަކުންވެސް ސަރުކާރަށް ފާއިތުވި ދެ އަހަރު ގިނަ ކާމިޔާބީތަކެއް ޙާޞިލް ކުރެވިފައިވާ ކަމަށެވެ.
ރައީސްގެ މި ބަސްދީގަތުމާ ގުޅިގެން ސަޢީދު ޓުވީޓު ކުރައްވައިފައި ވަނީ “ދަ ހިންދޫ” އަށް ބަސްދީ ގަތުމުގެ ކުރިން ފާއިތުވި 2 އަހަރު ރައީސް ޞާލިޙުގެ ސަރުކާރަށް ޙާޞިލުކުރެވުނު ކާމިޔާބީތައް ދިވެހިރާއްޖޭގެ ރައްޔިތުންނަށް ބުނެދޭން ޖެހޭ ކަމަށެވެ.
މީގެ އިތުރުން ސަޢިދު ވިދާޅުވަނީ، ފާއިތުވެ ދިޔަ 2 އަހަރު ދުވަހުގެ ތެރޭގައި ރާއްޖޭގެ ސިޔާސަތަށް ހާސިލު ކުރެވުނު ކާމިޔާބީތައް ރައްޔިތުންނަށް އެނގުން މުހިންމު ކަމަށާއި، އެއީ ލޮލަށް ނުފެންނަ ކާމިޔާބީއެއް ނަމަ އެ ކާމިޔާބީތައް ސިފަކޮށްދޭން ޖެހޭ ކަމަށެވެ.
