ޖެންޑަރ މިނިސްޓަރާ ބައްދަލު ކުރެވޭނެ ގޮތް ހަދައިދިނުމަށް އިދިކޮޅުން ގޮވާލައިފި
ޖެންޑަރ މިނިސްޓަރު އާއިޝަތު މުހައްމަދު ދީދީއާ ބައްދަލު ކުރުމަށް އިދިކޮޅު ކޯލިޝަނުން އެދިފައިވާތީ، މިނިސްޓަރާ ވީހާ ވެސް އަވަހަކަށް ބައްދަލުވާނެ ގޮތް ހަމަޖައްސައިދިނުމަށް އެ ކޯލިޝަނުން ގޮވާލައިފިއެވެ.
އިދިކޮޅު ކޯލިޝަނުން މިއަދު ނެރުނު ބަޔާނެއްގައި ބުނެފައިވަނީ 19 އޮކްޓޯބަރު 2020ގައި ޖެންޑަރ މިނިސްޓަރާއި ބައްދަލު ކުރުމަށް އެދި ވާނީ ސިޓީ ފޮނުވާފައި ކަމަށެވެ. އަދި މިނިސްޓަރާ ބައްދަލު ކުރުމަށް އެދިފައިވަނީ އެކޯލިޝަނަށް އެކިފަރާތްތަކުން ލިބެމުންދިޔަ ޝަކުވާތަކާއި ރޭޕް އަދި ޖިންސީ ފުރައްސާރައިގެ މައްސަލަތަކުގެ އިތުރުން އެކަންކަމަށް އިންސާފު ނުލިބި ލަސްވާތީ އަންހެނުންނާ ގުޅުންހުރި ކަންބޮޑުވުންތައް ހިއްސާ ކުރުމަށް ކަމުގައި ވެސް އިދިކޮޅުން ނެރެފައިވާ ބަޔާނުގައި ބުނެފައިވެއެވެ.
އިދިކޮޅުން ފޮނުވި ސިޓީގެ ޖަވާބުގައި އޭރު މިނިސްޓްރީން ބުނެފައިވަނީ ޖެންޑަރ މިނިސްޓަރ ރާއްޖެއިން ބޭރުގައި އުޅުއްވާތީ ކުރިއަށް އޮތް އެއް މަސް ދުވަހުގެ ތެރޭގައި ބައްދަލު ކުރެވެން ނެތް ކަމަށާއި މިނިސްޓަރ އެނބުރި ވަޑައިގެންނެވުމުން ބައްދަލުވުމާ ގުޅޭ ގޮތުން ޖަވާބެއް ދެއްވާނެ ކަމަށެވެ. އެހެން ނަމަވެސް އޭގެ ފަހުން ތިން މަސް ފާއިތުވެގެން ދިޔައިރު ވެސް ބައްދަލުވުމާ ގުޅޭ ގޮތުން އެއްވެސް ޖަވާބެއް ލިބިފައި ނުވާކަމަށް ވެސް ބަޔާނުގައި ބުނެފައިވެއެވެ.
މީގެ އިތުރުން އެބަޔާނުގައި ބުނެފައިވަނީ މިނިސްޓަރަކު ރާއްޖެއިން ބޭރަށް ވަޑައިގަންނަވާއިރު މަގާމާ ހަވާލުވެ ހުންނަވާ ޒިންމާދާރު ވެރިއަކު މިފަދަ ކަންކަމާ ޖަވާބުދާރީ ވާން ޖެހޭ ކަމަށް އެ ކޯލިޝަނުން ދެކޭ ކަމަށެވެ. އަދި މިފަދަ މުހިންމު ވުޒާރާއެއް ވަގުތީ ގޮތުން އެހެން މިނިސްޓަރަކާ ހަވާލު ނުކުރައްވާނަމަ އެއީ މި ސަރުކާރުން ރައްޔިތުންނާއި އެތައް ބައެއްގެ ހައްގުތައް ރައްކާތެރި ކުރުމަށް ވެފައިވާ ބޮޑު އިހުމާލެއް ކަމުގައި ވެސް މިބަޔާނުގައި ފާހަގަ ކޮށްފައިވެއެވެ. ހަމަ އެހެންމެ، މިކަމުން ސަރުކާރުގެ ދޯހަޅި ކަމާއި ހިންގުމުގެ ފުރިހަމަ ނިޒާމެއް ނެތި ރައްޔިތުންގެ ކަންބޮޑުވުންތަކަށް އެއްވެސް އަޅާލުމެއް ނެތްކަން ޔަގީން ކުރެވޭ ކަމުގައި ވެސް ބުނެފައިވެއެވެ.
