އިންޑިއާ އިން އުފެއްދި ކޮވިޑު-19 ވެކްސިން މާދަމާ ރާއްޖެ ގެންނަނީ
އިންޑިއާ އިން އުފެއްދި ކޮވިޑު-19 ވެކްސިން މާދަމާ ރާއްޖެ ގެންނާނެ ކަމަށް އިންޑިއާގެ ނޫސްތަކުން ރިޕޯޓުކޮށްފިއެވެ،
އިންޑިއާގެ "ވިއޮން" ނޫހުން ރިޕޯޓް ކޮށްފައިވާ ގޮތުގައި، ސީރަމް އިންސްޓްޓިއުޓް އޮފް އިންޑިއާއިން އުފައްދާފައިވާ އޮކްސްފޯރޑް - އެސްޓްރެޒެނެކާގެ ކޮވިޑް ޝީލްޑް ވެކްސިން ރާއްޖެ ގެނައުމަށް ހަމަޖެހިފައިވާ ކަމަށެވެ. އަދި ވެކްސިން ރާއްޖެއަށް ލިބޭނީ މާދަމާ ރާއްޖޭ ގަޑިން 1400 ގައި ކަމަށްވެސް އެނޫހުން ބުނެފައި ވެއެވެ.
ވެކްސިން އާ ގުޅުން ހުރި އެޕްރޫވަލްތައް މިހާރު ދިވެހި ސަރުކާރުން ދީފައިވާ ކަމަށް އެނޫހުން ރިޕޯޓް ކުރެއެވެ.
މިގޮތުން ރާއްޖެއަކީ އިންޑިއާގެ ވެކްސިން ފޯރުކޮށްދިން ފުރަތަމަ ޤައުމެވެ.
ނަމަވެސް ރާއްޖެއަށް ގެންނަން އުޅޭ ކަމަށް އިންޑިއާގެ ނޫސްތަކުން ބުނާ ވެކްސިންގެ އެެއްވެސް މައުލޫމާތެއް ދިވެހި ސަރުކާރުން ވެސް އަދި އެޗްއީއޯސީން ވެސް ހާމަ ކޮށްފައެއް ނުވެއެވެ.
ރާއްޖެއަށް ބޭނުންވާ ކޮވިޑް-19 ވެކްސިން ވަރަށް އަވަހަށް އިންޑިއާއިން ފޯރުކޮށްދޭނެ ކަމަށް އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވަނީ މިހަފްތާގެ ތެރޭގައި ވިދާޅުވެފައެވެ.
ކޮވިޑް-19 އަށް ވެކްސިން ޖެހުމަށް ބޭނުންވާ ފަރާތްތައް ރެޖިސްޓްރީވުމަށް އެޗްޕީއޭއިން ވަނީ ޕޯޓަލް އެއް އުފައްދައި، ރެޖިސްޓްރީވުމުގެ ފުރުސަތު ހުޅުވާލާފައެވެ. ރަޖިސްޓްރީ ވާން އެންމެ ފުރަތަމަ ހުޅުވާލާފައިވަނީ ސިއްހީ ހިދުމަތްތެރިންނާއި ސޯޝަލް ކެއާ ވޯކަރުންނަށެވެ.
އިންޑިއާގައި ވަނީ ކޮވިޑް ވެކްސިން ޖެހުމުގެ ކެމްޕެއިނެއް ފަށާފައެވެ. އެގައުމުގައި ބޭނުން ކުރުމުގެ ހުއްދަ ދީފައިވަނީ ސީރަމް އިންސްޓިޓިއުޓުން އުފެއްދި ކޮވިޝީލްޑް ވެކްސިނެވެ.
