ކޮވިޑް-19: ސިނެމާތައް ހުޅުވާލަނީ
ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ބަންދުކުރި ސިނަމާތައް މާދަމާއިން ފެށިގެން ހުޅުވާލަން އެޗްޕީއޭއިން ނިންމައިފިއެވެ.
އެޗްޕީއޭއިން މިއަދު ކުރި އިއުލާނެއްގައި ވިދާޅުވީ ރާއްޖޭގައި ކޮވިޑް-19 ކޮންޓްރޯލް ކުރުމަށް ޓަކައި އާންމު ސިއްހަތުގެ ގާނޫނުގެ ދަށުން ސިނަމާތައް ބަންދު ކުރުމަށް، އެ އޭޖެންސީން ނެރުނު އަމުރު ބާތިލްކުރަން ނިންމާފައިވާ ކަމަށެވެ.
އަދި "ކޮވިޑް-19ގެ ހާލަތުގައި ރައްކާތެރިކަމާއެކު ސިނަމާތައް ހިންގުމާއި ސިނަމާ ހޯލްތައް ބޭނުން ކުރުމުގެ އުސޫލު" އާ އެއްގޮތަށް ޖެނުއަރީ މަހުގެ 25 ވަނަ ދުވަހުން ފެށިގެން ސިނަމާތައް ހުޅުވާލަން ނިންމާފައިވާ ކަމަށް ވެސް އެޗްޕީއޭގެ އިއުލާނުގައި ވެއެވެ.
ރާއްޖޭގައި ކޮވިޑް-19 ފެތުރެން ފެށުމާ ގުޅިގެން ސިނަމާތައް ބަންދު ކޮށްފައި ވަނީ މާޗު 16 ވަނަ ދުވަހުއެވެ.
ރާއްޖޭގައި ކޮވިޑް ކޭސްތައް މަދުވެ، އާންމު ހާލަތަށް ރުޖޫއަވުމާއެކު ކޮވިޑާ ގުޅިގެން އަޅާފައިވާ ބައެއް ފިޔަވަޅުތަކަށް ވަނީ ލުއި ދީފައެވެ.
