ޤުރްއާން އަދި ޓިއުޝަން ކްލާސްތައް ހުޅުވަން ވެސް ހުއްދަ ދީފި
ޤުރްއާން ކްލާސްތަކާއި ޓިއުޝަން ކްލާސްތައް ހުޅުވަން ވެސް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހުއްދަ ދީފިއެވެ.
އެޗްޕީއޭއިން މިކަމަށް ހުއްދަ ދީފައިވާކަން ހާމަކުރަމުން އެޑިއުކޭޝަން މިނިސްޓްރީން މިއަދު ބުނީ، އެޗްޕީއޭ އިން ކަނޑައަޅާފައިވާ މިންގަނޑުތަކާ އެއްގޮތަށް ޤުރްއާން ކްލާސްތަކާއި ޓިއުޝަން ކްލާސްތައް ހުޅުވަން ހުއްދަ ދީފައިވާ ކަމަށެވެ.
އެގޮތުން އެމިނިސްޓްރީގައި ރެޖިސްޓްރީ ކޮށްގެން ހިންގާ ޓިއުޝަން ކްލާސްތަކާއި ޤުރްއާން ކްލާސްތައް މިއަދުން ފެށިގެން ހުޅުވާ، ހިދުމަތް ދިނުން އެންމެ ރަނގަޅު ކަމަށް އެޑިއުކޭޝަން މިނިސްޓްރީން ބުނެފައިވެއެވެ.
އެމިނިސްޓްރީން ބުނެފައިވަނީ ޓިއުޝަން ސެންޓަރު ތަކާއި ގުރުއާން ކްލާސްތައް ހިންގަން ވާނީ ރައްކާތެރިކަމުގެ ފިޔަވަޅުތައް އަޅައިގެން އެޗްޕީއޭގެ ގައިޑްލައިންތަކާ އެއްގޮތަށް ކަމަށެވެ.
ރާއްޖޭގައި ވެސް ކޮވިޑް-19 ފެތުރެމުން ދިޔުމުން، ބަލިން ރައްކާތެރިވެ، ބަލި ފެތުރުން ކޮންޓްރޯލް ކުރުމަށް އެޅި ފިޔަވަޅެއްގެ ގޮތުގައި ޤުރްއާން ކްލާސްތަކާއި ޓިއުޝަން ކްލާސްތައް ވަގުތީ ގޮތުން ބަންދު ކުރީ މިދިޔަ އަހަރުގެ ކުރީކޮޅެވެ.
ޤުރްއާން ކްލާހާއި ޓިއުޝަން ކްލާސްތައް ހުޅުވަން ހުއްދަ ދީފައިވާއިރު، އެޗްޕީއޭ އިން ވަނީ މާދަމާއިން ފެށިގެން ސިނަމާތައް ހުޅުވުމުގެ ހުއްދަ ވެސް ދީފައެވެ.
