ސިނަމާތަކަށް ވަދެވުނަސް، ތިބެން ޖެހޭނީ ތިން ފޫޓު ދުރުގައި
ސިނަމާ އަދި ތިއޭޓަރުތައް މާދަމާއިން ފެށިގެން ހުޅުވާލި ނަމަވެސް އެތަނަށް ވަންނަ މީހުންގެ ތެރެއިން އެކުގައި ދާ އެއް ގްރޫޕެއްގެ މީހުންނާއި އެއް އާއިލާއެއްގެ މީހުން ފިޔަވާ، އެހެން މީހުން ތިބެންވާނީ މަދުވެގެން ތިން ފޫޓުގެ ދުރުމިނުގައި ކަމަށް އެޗްޕީއޭ އިން ބުނެފި އެވެ.
އެޗްޕީއޭއިން ވަނީ ސިނަމާތައް ހުޅުވާއިރު އަމަލު ކުރަންޖެހޭނެ ގައިޑްލައިން ވަނީ އާންމު ކޮށްފައެވެ.
އެގައިޑްލައިނުގައި ބުނާ ގޮތުން ސިނަމާ ހޯލަށް ވަދެ ނުކުމެ އުޅުމުގައި ތިން ފޫޓުގެ ގައިދުރުމިން ބެހެއްޓޭނެ ގޮތަށް އިންތިޒާމު ކުރަން ޖެހެއެވެ.
ވަންނަ ދޮރު ކައިރީގައި ސެނިޓައިޒަރ ބަހައްޓަން ޖެހޭނެ ކަމަށާއި، ސައިބޯނި ލައިގެން އަތް ދޮވެވޭނެ އިންތިޒާމު ވެސް ހުންނަން ޖެހޭނެ ކަމަށް ވެސް ގައިޑްލައިނުގައި ބުނެފައިވެއެވެ.
މީގެއިތުރުން ސިނަމާ ހޯލަށް މީހުން ވަންނަ އިރު ކޮވިޑުގެ އަލާމާތްތައް ހުރޭތޯ ޗެކު ކުރުމަށް ގައިޑްލައިން ބުނާއިރު، ބަލީގެ އަލާމާތްތައް ހުންނަ މީހުން ސިނަމާ ހޯލަށް ވައްދައިގެން ނުވާނެ ކަމަށް ވެސް އެ އުސޫލުގައި ބުނެފައި ވެއެވެ.
ޓިކެޓު ގަތުން ވެސް އޮންލައިންކޮށް، ނުވަތަ ފޯނު މެދުވެރިކޮށް ގަނެވޭނެ ގޮތަށް އިންތިޒާމު ކުރުމަށާއި އަދި ފައިސާގެ މުއާމަލާތްތައް ޑިޖިޓަލްކޮށް ކުރަން ވެސް ގައިޑްލައިން ގައި ބުނެފައިވެއެވެ.
ޓިކެޓު ޗެކުކުރުމުގައި ތިން ފޫޓުގެ ދުރުމިން ބަހައްޓައި، ތަނަށް ވަންނަ މީހުންނަށް މުއާމަލާތް ކުރާއިރު މާސްކުގެ އިތުރުން ފޭސް ޝީލްޑްވެސް ބޭނުން ކުރަން ޖެހޭނެ ކަމަށް ވެސް ބުނެފައި ވެއެވެ.
އެޗްޕީއޭގެ ގައިޑްލައިން ބުނާގޮތުން، އެކި ދަންފަޅިތަކަށް ބަހާލައިގެން ޝޯ ބާއްވާނަމަ، ކޮންމެ ދެ ދަންފަޅިއެއް ދޭތެރޭގައި ތަން ރަނގަޅަށް ސާފު ކުރެވޭނެ ވަގުތު ދޭންޖެހޭނެ އެވެ. އަދި ދެ ދަންފަޅި ބަލާލަން ޖެހޭނީ އެއް ދަންފަޅިއާ އަނެއް ދަންފަޅި ދިމާ ނުވާނެހެންނެވެ.
ސިނަމާ އަށް ދާ މީހުން މާސްކު އަޅައިގެން ތިބޭތޯ، ކަށަވަރު ކުރުމަށް ވެސް ގައިޑްލައިން ބާރު އަޅައެވެ.
