މާލޭގެ ސްކޫލުތަކުގައި ކިޔަވައިދޭން ފަށާނީ ގްރޭޑް 9 އިން މައްޗަށް: އެޑިއުކޭޝަން
ލޮކްޑައުންއަށް ދޭ ލުއިތަކާއެކު، މާލޭގެ ސްކޫލުތަކުގައި ފުރަތަމަ ކިޔަވައިދޭން ފަށާނީ ގްރޭޑް 9 އިން ފެށިގެން މަތީގެ ގްރޭޑުތަކަށް ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.
އެޑިއުކޭޝަން މިނިސްޓްރީގެ ސީނިއާ ޕޮލިސީ ޑިރެކްޓަރު މޫސާ އާދަމް "މިހާރު" ނޫހަށް ވިދާޅުވީ އަންނަ މަހު ކިޔެވުން ފަށާއިރު މާލޭގައި ކިޔަވައި ދޭނީ ކީ ސްޓޭޖް ހަތަރެއް (ގްރޭޑު 9 ،10) އަދި ކީ ސްޓޭޖް ފަހެއް (11 ،12) ގެ ދަރިވަރުންނަށް އެކަނި ކަމަށެވެ.
ނަމަވެސް ރާއްޖޭގެ އެހެން ސްކޫލުތަކުގައި ގްރޭޑު 1-12 އަށް ކިޔަވައިދޭނެ ކަމަށް އޭނާ ވިދާޅުވި އެވެ. މޫސާ ވިދާޅުވީ ކިޔެވުން ފަށާ ސީދާ ތާރީހެއް އަދި ނުނިންމާ ކަމަށާއި އެކަމަކު ބެލެވޭ ގޮތުގައި އަންނަ މަހުގެ 1 ގައި ސްކޫލުތަކުގައި ކިޔަވައިދޭން ފަށާނެ އެވެ.
އެޑިއުކޭޝަން މިނިސްޓްރީން ބުނެފައިވާ ގޮތުގައި ސްކޫލަށް ދަރިވަރުން ހާޒިރުވާން ޖެހޭނީ ހަފްތާއަކު ހަތަރު ދުވަހުކަމަށާއި ފަސް ވަނަ ދުވަހު ސްކޫލަށް ޓީޗަރުން ހާޒިރުވެ ކިޔަވައިދޭނެ ބައިތައް ތައްޔާރު ކުރާނެ ކަމަށެވެ. މިއީ ދަރިވަރުންނާއި ޓީޗަރުންގެ ރައްކާތެރިކަމަށް ގެންނަ ބަދަލެއް ކަމަށް ބުނެފައިވެއެވެ.
ސްކޫލުތައް އަލުން ހުޅުވާލުން ބަހާލާފައި ވަނީ ތިން ކެޓެގަރީއަކަށެވެ. އެގޮތުން ފުރަތަމަ ކެޓެގަރީގައި ލޮކްޑައުންގައި ހިމެނޭ ރަށްރަށުގެ ހުރިހާ ސްކޫލެއް ވެސް ބަންދުވާނެކަމަށް އެޑިއުކޭޝަން މިނިސްޓްރީން ބުނެއެވެ.
އަދި މޮނިޓަރިންގެ ހާލަތުގައި ހުރި ރަށްރަށުގައި ކީީސްޓޭޖް ހަތަރެއް އަދި ފަހެއް ގެ ދަރިވަރުންނަށް އެކަނި ކިޔަވައިދޭން ނިންމާފައިވާއިރު ކޮވިޑް-19 ގެ ކޭސްތައް ނެތް ރަށްރަށުގައި ހުރިހާ ގްރޭޑެއްގެ ދަރިވަރުންނަށް ވެސް ކިޔަވައިދޭނެކަމަށް ވަނީ ބުނެފައެވެ.
މީގެއިތުރުން ކޮންމެ ދުވަހަކު ވެސް ގިނަވެގެން ކިޔަވައިދެވޭނީ ހަތަރު މާއްދާ ކަމަށްވާއިރު، ކްލާސްރޫމުގައި ކިޔަވައިނުދެވޭ ބައިތައް ފުރިހަމަކުރަން ގޫގުލް ކްލާސްރޫމް ބޭނުން ކުރަންޖެހެއެވެ. އެގޮތުން ކޮންމެ ދެ ހަފުތާއިން އެއް ހަފްތާގައި ޓީޗަރުންނަށް އޮންލައިން ކްލާސްތައް ވެސް ބާއްވާނެ އެވެ.
