ފަހުވަގުތަށް މަޑުނުކޮށް ޓެކްސް ދައްކަން މީރާއިން އިލްތިމާސްކޮށްފި
ޓެކްސްގެ ސުންގަޑިތައް ހަމަވާތީ ފަހުވަގުތަށް މަޑުނުކޮށް ޓެކްސް ބަޔާނާއި ފައިސާ ދެއްކުން އަވަސްކުރަން މީރާ އިން އިލްތިމާސް ކޮށްފިއެވެ.
މީރާއިން މިހެން ބުނެފައި ވަނީ ކޮވިޑް-19 އިން ރައްކާތެރިވެ ތިބުމަށް ގައިދުރުކަން ބެހެއްޓުމުގެ ގޮތުންނެވެ. ޓެކްސްގެ ސުންގަޑިތަކާ ދިމާކޮށް ފަހުވަގުތު ޓެކްސް ބަޔާނާއި ފައިސާ ދައްކާ މީހުން ގިނަވާ ކަމަށް މީރާއިން ވަނީ ބުނެފައެވެ.
މިކަމާ ގުޅިގެން ފަހު ވަގުތަށް މަޑުނުކޮށް ޓެކްސް ބަޔާނާއި ފައިސާ ދެއްކުން އަވަސްކުރަން މީރާ އިން ވަނީ އިލްތިމާސް ކޮށްފައެވެ. މި މަހު ދައްކަން ހަމަޖެހިފައިވާ ޓެކްސް ތަކުގެ ތެރެއިން ޑިސެމްބަރު 2020ގެ ޖީއެސްޓީ ދެއްކުމަށް ހަމަޖެހިފައި ވަނީ މާދަމާގެ ނިޔަލަށެވެ. އަދި އިންކަމް ޓެކްސްގެ 2020ގެ ދެވަނަ އިންޓަރިމް ބަޔާން ހުށަހެޅުމާއި ފައިސާ ދެއްކުމުގެ އެންމެ ފަހު ދުވަހަކީ 31 ޖެނުއަރީއެވެ.
މީރާގެ ގިނަ ޚިދުމަތްތައް އޮންލައިންކޮށް ފޯރުކޮށްދޭއިރު، ޖީއެސްޓީ ބަޔާނާއި އިންކަމް ޓެކްސް އިންޓަރިމް ބަޔާން ހުށަހެޅުމާއި ފައިސާ ދެއްކުމަކީ އޮންލައިންކޮށް ހޯދޭ ހިދުމަތްތަކެކެވެ. މީ ގެއިތުރުން ޖީއެސްޓީ ސުން ބަޔާން ހުށަހަޅަންޖެހޭ ފަރާތްތަކަށް ވާރު ޕޭ ނުވަތަ މީރާ މޮބައިލް އެޕްލިކޭޝަން މެދުވެރިކޮށް ބަޔާން ހުށަހެޅޭނެއެވެ.
އެހެންކަމުން، ތޮއްޖެހިގެން ހިދުމަތް ހޯދަން ދިޔުމުގެ ބަދަލުގައި އޮންލައިންކޮށް ދެވޭ ޚިދުމަތްތައް އޮންލައިންކޮށް ކުރިޔަށް ގެންދިޔުމަށް މީރާއިން ވަނީ އިލްތިމާސްކޮށްފައެވެ.
