ކޮވިޑް-19: ހޮސްޕިޓަލުގައި ފަރުވާ ދޭ މީހުންގެ އަދަދު 152 އަށް
ކޮވިޑް-19 ޖެހިގެން ހޮސްޕިޓަލުގައި އެނދުމަތި ކޮށްގެން ފަރުވާ ދޭމީހުންގެ އަދަދު ބޮޑު ތަނުން އިތުރުވެއްޖެއެވެ.
އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތަކަށް ބަލާއިރު، އިއްޔެ އިރު އޮއްސި ހައެއް ޖެހުމާ ހަމައަށް ޖުމްލަ 152 މީހަކު އަންނަނީ ހޮސްޕިޓަލުގައި ފަރުވާ ހޯދަމުންނެވެ. މިއީ ނިސްބަތުން ބަލާއިރު ބޮޑު އަދަދެކެވެ.
ހޮސްޕިޓަލުތަކުގައި ފަރުވާ ދޭން ޖެހޭ މީހުންގެ އަދަދު އިތުރު ވާނަމަ، އެކަށީގެންވާ ވަރަށް އެނދު ނުލިބި ހޮސްޕިޓަލުތައް ފުރޭނެ ކަމުގެ ބިރު މީގެ ކުރިން ވެސް ސިއްހީ މާހިރުން ވަނީ ދީފައެވެ.
އެގޮތުން ދަރުމަވަންތަ ހޮސްޕިޓަލުގެ އައިސީޔޫގެ 50 އިންސައްތަ މިހާރު ވެސް ފުރިފައިވާ ކަމަށް އައިޖީއެމްއެޗްގެ މެޑިކަލް ޑިރެކްޓަރު ޔޫސުފް ޝާން ވަނީ ދާދި ފަހުން ވިދާޅުވެފައެވެ.
މިހާތަނަށް ރާއްޖެއިން ޖުމްލަ 15،736 މީހުން ފައްސި ފައްސި ވެފައިވާއިރު، 14،096 މީހުން ވަނީ ބަލިން ރަނގަޅުވެފައެވެ. އަދި ބަލި ޖެހިގެން 51 މީހަކު ވަނީ ނިޔާ ވެފައެވެ.
މިދުވަސްވަރު ރާއްޖެއިން ބައްޔަށް ފައްސިވާ މީހުންގެ އަދަދު އިތުރު ވެފައިވާއިރު ކޮންމެ ދުވަހަކު ވެސް އެވްރެޖުކޮށް 100 އަށް ވުރެ ގިނަ މީހުން ފައްސިވަމުން އަންނަ ކަން ފާހަގަ ކޮށްލެވެއެވެ.
