ޑރ.ވަހީދުގެ ރައްދު ނަޝީދުއަށް: މިޔަންމާގެ ބަޣާވާތާއި 7 ފެބްރުއަރީއާ އެއްފަދަ ކުރުމަކީ ދިވެހި ސިފައިންނަށް ގޯނާކުރުން
މިޔަންމާގެ ބަޣާވާތާއި 7 ފެބްރުއަރީއާ އެއްފަދަ ކުރުމަކީ ދިވެހި ސިފައިންނަށް ގޯނާކުރުން ކަމަށް ކުރީގެ ރައީސް ޑރ. ޑރ.މުހައްމަދު ވަހީދު ހަސަން ވިދާޅުވެއްޖެއެވެ.
ޑރ.ވަހީދު މިހެން ވިދާޅުވެފައި ވަނީ މަޖިލީހުގެ ރައީސް، އަދި ކުރީގެ ރައީސް މުހައްމަދު ނަޝީދު މިއަދު ކުރެއްވި ޓްވީޓަކާ ގުޅިގެންނެވެ. ނަޝީދު ވަނީ މިއަންމާއަށް މިއަދު ގެނައި އަސްކަރީ ބަޣާވާތާއި ރާއްޖޭގެ ވެރިކަން 7 ފެބްރުއަރީގައި ބަދަލުވި ހާދިސާއާ އެއްފަދަ ކުރައްވާފައެވެ.
ނަޝީދު ދެއްކެވި ވާހަކަފުޅުތަކަށް ރައްދު ދެއްވައި ޑރ.ވަހީދު ކުރެއްވި ޓުވީޓެއްގައި ވިދާޅުވީ "މިޔަންމާގެ މިލިޓަރީ އިންގިލާބާ ފެބުރުއަރީ 7 ގެ ރިޔާސީ އިސްތިއުފާއާ އެއްވަރު ކުރުމަކީ ދިވެހި ލޮބުވެތި ސިފައިންނަށް ގޯނާ ކުރުން" ކަމަށެވެ.
ނަޝީދު ވިދާޅުވީ މިއަންމާއަށް މިއަދު ގެނައި ބަޢާވާތާއި 2012 ވަނަ އަހަރު ނަޝީދުގެ ވެރިކަމުގައި ހިނގައި ދިޔަ 7 ފެބްރުއަރީގެ ހަމަނުޖެހުންތަކާއެކު ވެރިކަން ބަދަލުވެގެން ދިޔުމާއި މިއަންމާއަށް މިއަދު ގެނައި އަސްކަރީ ބަޣާވާތާއި އެއްގޮތް ކަންތައްތަކެއް އެބަހުރި ކަމަށެވެ.
އެމަނިކުފާނު ވިދާޅުވީ ރާއްޖެއެކޭ އެއްގޮތަށް މިޔަންމާ އާއި އެމެރިކާ އަދި އެހެން ހުރިހާ ތަނެއްގައި ވެސް ބަޣާވަތް ކުރަން ކުރާ މީހުން އުޅޭ ކަމަށެވެ.
