ވެކްސިނާ ގުޅޭ ދޮގު މައުލޫމާތު ފަތުރާނަމަ، ފިޔަވަޅު އަޅާނަން: ބްރޯޑްކޮމް
ރާއްޖޭގައި ޖަހަން ފަށާފައިވާ ކޮވިޑް-19 ވެކްސިން އާ ގުޅޭ ދޮގު މައުލޫމާތު ފަތުރައި، ރައްޔިތުންގެ ހިތްތަކުގައި ނުރައްކާތެރިކަން އުފައްދާނަމަ ފިޔަވަޅު އަޅާނެ ކަމަށް މޯލްޑިވްސް ބްރޯޑްކާސްޓިން ކޮމިޝަނުން ބުނެފިއެވެ.
މިކަމާ ގުޅިގެން ބްރޯޑްކޮމް އިން ނެރުނު ބަޔާނެއްގައި ވަނީ މުޅި ދުނިޔެއަށް ދިމާވެފައިވާ ކޮވިޑް-19 ގެ ނުރައްކާތެރި ބަލިމަޑުކަމުން އަރައިގަތުމަށް ކުރަމުންދާ މަސައްކަތުގެ ތެރެއިން، ދިވެހިރާއްޖޭގައި ކޮވިޑް -19 ވެކްސިން ޖަހަން ފެށުމާ ގުޅިގެން، އެކަމާ ގުޅޭ މަޢުލޫމާތު ބްރޯޑްކާސްޓްކުރުމުގައި ޢާންމުންގެ މެދުގައި ހާސްކަމާއި ނުތަނަވަސްކަން އުފެދޭ ގޮތަށް ސާބިތު ނުހިފޭ މަޢުލޫމާތު ގެނެސްދިނުމުން އެއްކިބާވުމަށާއި، މިކަމާ ގުޅޭ ކޮންޓެންޓް ގެނެސްދިނުމުގައި ޒިންމާދާރު ނޫސްވެރިކަން ކުރިއަށް ގެންދިއުމަށް އިލްތިމާސްކޮށްފައެވެ.
އެގޮތުން ކޮވިޑް-19 ވެކްސިނާ ގުޅޭގޮތުން ގެނެސްދޭ ހަބަރުތަކަކީ ކަމާ ބެހޭ އިދާރާތަކުން މަޢުލޫމާތުގެ ސައްޙަކަން ކަށަވަރުކުރުމަށް ފަހު ގެނެސްދޭ މަޢުލޫމާތަކަށް ވާން ޖެހޭނެ ކަމަށާއި ޢުލޫމާތު ގެނެސްދިނުމުގައި ސިއްޙީ ދާއިރާގެ މާހިރުންނާއި ފަންނީ ބޭފުޅުންގެ ބައިވެރިވުމާއި ލަފާގެ މަތިން ގެނެސްދިނުމަށް ބްރޯޑްކޮމް އިން ވަނީ އިރުޝާދު ދީފައެވެ.
މީގެ އިތުރުން ރައްޔިތުންގެ މެދުގައި ނުތަނަވަސްކަން އުފެދޭ ގޮތަށް ކޮވިޑް-19 ވެކްސިންއާ ގުޅޭ މަޢުލޫމާތު ނުފެތުރުމަށް ސަމާލުކަން ދިނުމަށް ވަނީ އެދިފައެވެ.
ބްރޯޑްކާސްޓަރުން ގެނެސްދޭ ކޮވިޑް-19 ވެކްސިންގެ ހަބަރާއި މައުލޫމާތު އެ ކޮމިޝަނުން ވަރަށް ގާތުން މޮނިޓަރ ކުރަމުން ގެންދާނެ ކަމަށާއި ބްރޯޑްކާސްޓް ކުރުމުގެ ސުލޫކީ މިންގަނޑާއި ހިލާފަށް ކޮންޓެންޓް ގެނެސްދޭނަމަ ބްރޯޑްކާސްޓަރުންނާމެދު ފިޔަވަޅު އަޅާނޭ ކަމަށް އެ ކޮމިޝަނުން ބުނެއެވެ.
