މިދިޔަމަސް ނިމުނުއިރު ރާއްޖެ ޒިޔާރަތްކުރި ފަތުރުވެރިންގެ އަދަދު 92000 އަށް ވުރެ މައްޗަށް
މިދިޔަމަސް ނިމުނުއިރު ރާއްޖެއަށް 92000 އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.
މިއީ ޖަނަވަރީ މަހު ރާއްޖެ އަންނާނެކަމަށް ޓޫރިޒަމް މިނިސްޓްރީން އަންދާޒާކުރި އަދަދަށްވުރެ އިތުރު އަދަދެކެވެ. މިދިޔަ އަހަރާ އަޅާ ބަލާއިރު މިއަހަރު ފަތުރުވެރިން އައިސްފައިވާ މިންވަރުވަނީ %47 ދަށްވެފައެވެ. މިދިޔަ އަހަރުގެ ޖަނަވަރީމަހު ރާއްޖެ އައިސްފައިވަނީ 173874 ފަތުރުވެރިންނެވެ.
މިދިޔަ މަހު ރާއްޖެއަށް އެންމެ ގިނައިން ފަތުރުވެރިން އައިސްފައިވާ ޤައުމުތަކުގެ ތެރޭގައި ރަޝިއާ، އިންޑިއާ، ޔޫކްރޭން އަދި ކަޒަކިސްތާނު ހިމެނެއެވެ. ރާއްޖެއަށް ފަތުރުވެރިން އެންމެ ގިނައިން އައިސްފައި ވަނީ ރަޝިއާ އިންނެވެ. ރަޝިއާއިން ޖެނުއަރީ މަހު 20،973 ފަތުރުވެރިން އައިސްފައިވާއިރު އިންޑިއާ އިން އައިސްފައިވަނީ 19،135 ފަތުރުވެރިންނެވެ. ޔޫކްރޭންއިން އައިސްފައި ވަނީ 7210 ފަތުރުވެރިންނެވެ. އަދި ކަޒަކިސްތާނުން 4434 އެވެ.
ބޯޑަރު ހުޅުވާލިފަހުން ރަޝިއާއިން ރާއްޖެއަށް އައި ފަތުރުވެރިންގެ އަދަދު އިތުރުވެ ރާއްޖޭގެ ޓޮޕް އިންބައުންޑް މާކެޓަކަށް ރަޝިއާ ވެފައިވާ ކަން ވެސް މީގެ ކުރިން ޓޫރިޒަމް މިނިސްޓްރީންވަނީ އާންމުކޮށްފައެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި ފަތުރުވެރިންނަށް ޚިދުމަތްދޭ 614 ތަނެއް ހުޅުވައި އަލުން ޚިދުމަތް ދޭން ވަނީ ފަށާފައެވެ. މީގެ ތެރޭގައި ރިސޯޓްތަކާއި، ސަފާރީތަކާއި ގެސްޓް ހައުސްތައް ވެސް ހިމެނެއެވެ. މިއާއެކު ފަތުރުވެރިންނަށް ޚިދުމަތްދޭ އެނދުގެ އަދަދު ވަނީ 43000 އަށްވުރެ އިތުރުވެފައެވެ.
