ކުޅިވަރުގެ ހަރަކާތްތައް ހުއްޓާލަން އަންގައިފި
އެކަނި ކުރާ ކަސްރަތުތައް ފިޔަވާ، ހުރިހާ ކުޅިވަރުގެ ހަރަކާތްތަކާއި ކަސްރަތުތައް ދެ ހަފްތާއަށް ހުއްޓާލަން އަންގައިފިއެވެ.
ރާއްޖޭގައި މިދުވަސްވަރު އަނެއްކާ ވެސް ހަލުވިކަމާއެކު ކޮވިޑް-19 ފެތުރެމުން ދިޔުމާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ރައްކާތެރިވުމުގެ ފިޔަވަޅުތަކެއް އަޅާފައެވެ.
އެގޮތުން އެކަނި ކުރާ ކަސްރަތު (ހިނގަން ދިޔުމާއި ދުވަން ދިޔުން ފަދަ ކަސްރަތުތައް) ފިޔަވާ އެހެން ހުރިހާ ކުޅިވަރު ހަރަކާތްތަކާއި ކަސްރަތުތައް ވަނީ ދެ ހަފްތާއަށް ހުއްޓާލަން އަންގާފައެވެ.
ކޮވިޑް-19 ގެ ކޭސްތައް މިދިޔަ ސެޕްޓެމްބަރު މަހުން ފެށިގެން މަދުވުމުން، އެޗްޕީއޭއިން ވަނީ ބައެއް ލުއިތައް މީގެ ކުރިން ދެއްވާފައެވެ. އެގޮތުން މިދިޔަ ޑިސެމްބަރު މަހު ކާފިއު ގަޑި އުވާލާ، ކުޅިވަރު ކުޅޭ ތަންތަނާއި ޖިމްފަދަ ތަންތަން ހުޅުވުމުގެ ހުއްދަ ވެސް ދެއްވިއެވެ.
ނަމަވެސް މިދިޔަ ޖެނުއަރީ މަހު ފަހުކޮޅު އަނެއްކާވެސް ކޭސްތައް އިތުރުވަމުން ގޮސް ނިމިދިޔަ ހަފްތާގައި ފައްސިވީ އަދަދު ކޮންމެ ދުވަހަކުވެސް 100 އިން މަތިވުމުގެ އިތުރުން އިއްޔެ ފައްސިވީ އަދަދު ވަނީ 215 އަށް އަރާފައެވެ.
ކުޅިވަރު ހަރަކާތްތަކާއި ކަސްރަތުތައް ދެ ހަފްތާއަށް ހުއްޓާލަން އަންގާފައިވާއިރު، ޕާކުތަކާއި މައިޒާންތައް ވެސް ދެ ހަފްތާއަށް ބަންދު ކުރަން އެޗްޕީއޭއިން ވަނީ ނިންމާފައެވެ.
ނަމަވެސް ކަސްރަތު ކުރަން ކަނޑައަޅާފައިވާ ޕާކުތަކާއި މައިޒާންތަކުގައި އެޗްއީއޯސީން ކަނޑައަޅާ ގައިޑްލައިނާ އެއްގޮތަށް ކަނޑައަޅާ ގަޑިތަކުގައި ކަސްރަތު ކުރުމުގެ ހުއްދަ ވަނީ ދީފައެވެ.
