ހަލުވި ކަމާއެކު ވައިރަސް ފެތުރުނީ އާ ވޭރިއަންޓް ރާއްޖެއަށް އައި ހިސާބުން

ރާއްޖޭގައި މިހާރު ކޮވިޑް ބަލި ޖެހޭ މީހުންގެ 30 އިންސައްތައަކީ އާ ވައްތަރު ޖެހޭ މީހުން ކަމަށާއި މިހާރު ރާއްޖޭގައި ކުރިއަށް ވުރެ ހަލުވި ކަމާއެކު ކޮވިޑް-19 ފެތުރެމުން ދާނެ ކަމަށް ލަފާ ކޮށްފިއެވެ.

Ads by MWSC

ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ މިހާރު ކުރިއަށްދާ ކުއްލި ނޫސްވެރިންގެ ބައްދަލުވުމުގައި ޑރ. ޝީނާ ވިދާޅުވީ، ދުނިޔޭގެ އެހެން ގައުމު ތަކުގައި ވެސް އާ ވޭރިއަންޓުތަކާއެކު ބަލި ފެތުރުން އަވަސް ވެގެން ދިޔަ ކަމަށާއި، ރާއްޖޭގައި ވެސް ފެންނަމުން ދަނީ އެފަދަ ހާލަތެއް ކަމަށެވެ.

އަދި ފަހަކަށް އައިސް ރާއްޖޭގައި ކޮވިޑް-19 އަށް ޕޮޒިޓިވް މީހުންގެ ތިން ބައި ކުޅަ އެއް ބައި މީހުންނަކީ ދުނިޔޭގެ އެކި ކަންކޮޅުތަކުން މިހާރު ފެންނަމުންދާ އެ ބަލީގެ އާ ބާވަތް ނުވަތަ ވޭރިއަންޓް ޖެހިފައިވާ މީހުން ކަމަށް ލަފާ ކުރެވޭ ކަމަށެވެ.

އެގޮތުން ގައިދުރުކަމުގެ ފިޔަވަޅުތަކާއި މާސްކު އެޅުން ފަދަ ކަންކަން ފަސޭހަ ކޮށްލައިފިނަމަ މި ވޭރިއަންޓް ފެތުރުމުގެ ފުރުސަތު ބޮޑު ކަމަށް މިއަދުގެ ޕްރެސް ކޮންފަރެންސްގައި ވަނީ ވިދާޅުވެފައެވެ.

ފަހަކަށް އައިސް ދުވާލަކު ބަލި ޖެހޭ މީހުން އަދަދު ސަތޭކައަށް ވުރެ މަތީގައި ހުރުމަށްފަހު، އިއްޔެ ވަނީ ރެކޯޑް އަދަދަކަށް މީހުން ޕޮޒިޓިވް ވެފައެވެ. މިއާއެކު މާދަމާއިން ފެށިގެން ރައްކާތެރިކަމުގެ ފިޔަވަޅުތައް ވަނީ އިތުރަށް ހަރުކަށި ކޮށްފައެވެ.