އެއްގަމު ލައިސަންސް ދޫކުރުން 7 ދުވަހަށް މެދުކަނޑާލައިފި
އެއްގަމު ލައިސަންސް ދޫކުރުން 7 ދުވަހަށް މެދުކަނޑާލައިފިއެވެ.
މިގޮތަށް ނިންމާފައިވަނީ ކޮވިޑް-19 ގެ ހާލަތު އިތުރަށް ގޯސް ވަމުން ދާތީ އަޅާ ރައްކާތެރިކަމުގެ ފިޔަވަޅެއްގެ ގޮތުންނެވެ.
މިނިސްޓްރީ އޮފް ޓްރާންޕޯޓް އެންޑް ސިވިލް އޭވިއޭޝަނުން މިއަދު ކުރި ޓްވީޓެއްގައި ބުނެފައި ވަނީ ކޮވިޑް-19 ގެ ހާލަތު އިތުރަށް ގޯސްވަމުންދާތީ އަޅާ ރައްކާތެރިކަމުގެ ފިޔަވަޅެއްގެ ގޮތުން އެއްގަމުގައި ދުއްވާ އުޅަނދުތަކުގެ ޑްރައިވިންގ ލައިސަންސަށް އަލަށް އެދޭ ފަރާތްތަކަށް މިއަދުން ފެށިގެން ކުރިއަށް އޮތް 7 ދުވަހަށް ޚިދުމަތް ދިނުން ވަގުތީ ގޮތުން ހުއްޓާލާފައި ވާކަމަށެވެ.
ރާއްޖޭގައި ފަހަކަށް އައިސް ކޮވިޑް-19ގެ ކޭސްތައް އިތުރުވަމުންދާ މި ދަނޑިވަޅުގައި އެޗްޕީއޭއިން ވަނީ ފިޔަވަޅުތައް ވަރުގަދަ ކުރަން ފަށާފައެވެ. އެގޮތުން މާލެ ސަރަޙައްދުގެ ކާފިއު ގަޑި އިތުރުކޮށް ރޭގަނޑު 8:30 އިން ފެށިގެން ފަތިހު 4:30 އަށް އެއްގަމު އުޅަނދު ދުއްވުން ވަނީ އަނެއްކާ ވެސް މަނާކޮށްފައެވެ.
މީގެ އިތުރުން މީހުން ދިރިއުޅޭ ހުރިހާ ރަށެއްގައި މާސްކް އެޅުން މަޖުބޫރުކޮށް، ޕާޓީތަކާއި އެއްވުންތައް ބޭއްވުން ވަނީ މަނާ ކޮށްފައެވެ.
