ކޮވިޑް-19 ރިލީފް ޕެކޭޖްގެ ދަށުން ވިޔަފާރިތަކަށް އެއް ބިލިއަނަށްވުރެ ގިނަ ރުފިޔާ ދޫކުރެވުނު: ރައީސް
ކޮވިޑް-19 އާ ގުޅިގެން އަސަރުކުރި ވިޔަފާރިތަކަށް، ރިލީފް ޕެކޭޖުގެ ދަށުން ވިޔަފާރިތަކަށް 1 ބިލިއަނަށް ވުރެ ގިނަ ރުފިޔާ ދޫކުރެވުނު ކަމަށް، މިއަހަރަށް ރައްޔިތުންގެ މަޖްލިސް ހުޅުވުމަށް ބޭއްވި ޖަލްސާގައި، ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު ވިދާޅުވީ ކޮވިޑް-19 ގެ ސަބަބުން އިގްތިސޯދީ ގޮތުން އެންމެ ބޮޑު ގެއްލުމެއް ލިބުނު އެއް ގައުމަކީ ރާއްޖެ ކަމަށާއި އިގްތިސޯދު ހީނަރުވެގެން ދިޔުމުން، މުވައްޒަފުންނަށް މުސާރަ ދިނުމާއި، ދިރިއުޅޭ ތަނުގެ ކުލި ދެއްކުމާއި، ބިލުތައް ދައްކާނެ ގޮތަކާ މެދު، ވިޔަފާރިވެރިންނާއި އާންމު ރައްޔިތުން ކަންބޮޑުވެ ހާސްވާނެ މިންވަރު ވަޒަން ކުރެވޭ ކަމަށެވެ.
މިކަމާ ގުޅިގެން އިޤްތިސާދު ހީނަރުވިޔަ ނުދިނުމަށް ޓަކައި ރިލީޕް ޕެކޭޖްގެ ތެރެއިން ވިޔަފާރިތަކަށް 1 ބިލިއަނަށްވުރެ ގިނަ ރުފިޔާގެ ލޯނު ސަރުކާރުން ދޫކޮށްފައިވާ ކަން ފާހަގަ ކުރައްވައި ރައީސް ވިދާޅުވީ ކޮވިޑްގެ ސަބަބުން އާންމު ރައްޔިތުންނަށް ލުއި ފަސޭހަ ކޮށްދިނުމުގެ ގޮތުން ހައުސިންގ ލޯންތަކަށް ލުއި ދީ، މަތީ ތަޢުލީމަށް ދޫކޮށްފައި ހުރި ލޯނުތައް ދައްކަންޖެހޭ މުއްދަތު ވެސް ފަސް ކޮށްދީފައި ވާނެކަމަށެވެ.
އަދި ކޮވިޑް-19 ގެ ސަބަބުން އާމްދަނީ އަށް އަސަރުކުރި ފަރާތްތަކަށް އެހީވުމުގެ ގޮތުން، މިދިޔަ ޑިސެންބަރުމަހުގެ ނިޔަލަށް 17147 މީހަކަށް، 221 މިލިއަނަށްވުރެ ގިނަ ރުފިޔާ ދިފައިވާނެ ކަމަށް ރައީސް ވިދާޅުވިއެވެ.
"ކަރަންޓާއި ބިލުތަކުން 117 މިލިއަން ރުފިޔާއަށްވުރެ ބޮޑު ޢަދަދެއް ކަނޑައިލަދިނިން. ސަރުކާރުގެ ރިލީފް ޕެކޭޖްގެ ތެރެއިން ކުދި އަދި މެދުފަންތީގެ ވިޔަފާރިތަކަށާއި، އަމިއްލަ މަސައްކަތްކުރާ މީހުންގެ އިތުރުން، ދިވެހިންގެ ވަޒީފާތައް ރައްކާތެރިކުރުމަށް ޝަރުތުކޮށް، ބޮޑެތި ވިޔަފާރިތައް ވެސް ހިމެނޭ ގޮތަށް، 1 ބިލިއަނަށްވުރެ ގިނަ ރުފިޔާގެ ލޯނު ވަނީ ދޫކޮށްފައި." ރައީސް ވިދާޅުވިއެވެ.
